హైదరాబాద్, వెలుగు: కేంద్రం ప్రకటించిన 50వేల టన్నుల యూరియాను ఈ వారంలోనే అందేలా చూడాలని కేంద్ర రసాయనాలు, ఎరువుల మంత్రిత్వ శాఖకు విజ్ఞప్తి చేసినట్లు రాష్ట్ర వ్యవసాయ శాఖ మంత్రి తుమ్మల నాగేశ్వర రావు తెలిపారు. రాష్ట్రంలో నెలకొన్న యూరియా కొరతపై తెలంగాణ కాంగ్రెస్ ఎంపీలు పార్లమెంట్లో చేసిన నిరసన ప్రదర్శనల కారణంగానే కోరమాండల్ ఇంటర్నేషనల్ లిమిటెడ్కు కేంద్రం ఆదేశాలు ఇచ్చిందని తెలిపారు.
ఈ సందర్భంగా తుమ్మల మీడియాతో మాట్లాడారు. ‘‘కర్నాటక నుంచి 10,800 టన్నుల యూరియా ఫస్ట్ షిప్‌‌మెంట్ ప్రారంభమైంది. ఈ వారంలో మరో 3 షిప్‌‌మెంట్ల ద్వారా మిగతా మొత్తం సరఫరా చేయాలని డైరెక్టర్ ఆఫ్ ఫెర్టిలైజర్స్ ఆదేశాలిచ్చింది. ఈ నెలలో యూరియా వినియోగం ఎక్కువగా ఉంది. జాప్యం లేకుండా సరఫరా చేయాలని కోరాం.” అని తుమ్మలపేర్కొన్నారు.
