హైదరాబాద్: బీఆర్ఎస్కు ఓటేస్తే బీజేపీకి వేసినట్లేనని.. ఈ మేరకు ఆ రెండు పార్టీల మధ్య చీకటి ఒప్పందం ఉందని మంత్రి వివేక్ వెంకటస్వామి అన్నారు. ఈ ఒప్పందంలో భాగంగానే బీజేపీ తెలంగాణలో 8 ఎంపీలు స్థానాలు గెలిచిందన్నారు. గ్రాడ్యుయేట్ ఎమ్మెల్సీ ఎన్నికల్లో బీజేపీ బలంగా ఉన్న దగ్గర బీఆర్ఎస్ కనీసం అభ్యర్థిని కూడా నిలబెట్టలేదని అన్నారు. ఇప్పుడేమో బీఆర్ఎస్ గెలుపు కోసం జూబ్లీహిల్స్లో బీజేపీ బలహీనమైన అభ్యర్థిని పోటీకి దించిందన్నారు.
ఇది ఆ రెండు పార్టీల మధ్య రహస్య ఒప్పందమని ఆరోపించారు. ముస్లిం సమాజం మాకు మద్దతు తెలిపి జూబ్లీహిల్స్లో గెలిపించారని రాహుల్ గాంధీకి చెప్పే అవకాశం ఇవ్వాలని ఓటర్లను కోరారు. జూబ్లీహిల్స్ ఉప ఎన్నిక ప్రచారంలో భాగంగా గురువారం (అక్టోబర్ 30) షేక్పేట్ డివిజన్లోని సబ్ జా కాలనీ, టోలిచౌకిలో ముస్లిం మైనారిటీ నాయకులతో మంత్రి వివేక్ వెంకటస్వామి, పరిగి ఎమ్యెల్యే రామ్మోహన్ రెడ్డి సమావేశమయ్యారు.
ఈ సందర్భంగా మంత్రి వివేక్ మాట్లాడుతూ.. షేక్ పేట్ డివిజన్లో డ్రైనేజీ పైప్ లైన్ పనులు జరుగుతున్నాయని తెలిపారు. జూబ్లీహిల్స్లో బీఆర్ఎస్ పదేళ్లలో ఏమి అభివృద్ధి చేయలేదని.. నియోజకవర్గంలో అభివృద్ధి పనులు అన్నీ కాంగ్రెస్ హయాంలోనే జరుగుతున్నాయని అన్నారు. కాంగ్రెస్ ప్రభుత్వంలో ముస్లిం లీడర్లు ఉన్నత స్థాయిలో ఉంటారన్నారు. ఈ ఎన్నికల్లో కాంగ్రెస్ అభ్యర్థి నవీన్ యాదవ్ను భారీ మెజారిటీతో గెలిపించాలని విజ్ఞ్తప్తి చేశారు.
