- వారి హక్కులకు భంగం కలిగించే ఏ చర్యనూ ఉపేక్షించం: మంత్రి వివేక్
- 4 లేబర్ కోడ్స్ను రాష్ట్రంలో అమలు చేయవద్దని మంత్రికి కార్మిక సంఘాల వినతి
- సీఎం రేవంత్ దృష్టికి తీసుకెళ్తానని మంత్రి వివేక్ వెంకటస్వామి హామీ
హైదరాబాద్, వెలుగు: కార్మికులకు రాష్ట్ర ప్రభుత్వంఅండగా ఉంటుందని, వారి హక్కులకు భంగం కలిగించే ఏ చర్యనూ ఉపేక్షించమని ఆ శాఖ మంత్రి వివేక్ వెంకటస్వామి అన్నారు. శనివారం హైదరాబాద్ సోమాజిగూడలోని నివాసంలో మంత్రి వివేక్ వెంకటస్వామిని కేంద్ర, రాష్ట్ర కార్మిక సంఘాల నాయకులు కలిశారు. కేంద్ర సర్కారు ఏకపక్షంగా తీసుకొచ్చిన 4 లేబర్ కోడ్లను రాష్ట్రంలో అమలు చేయకుండా అసెంబ్లీలో తక్షణమే వ్యతిరేక తీర్మానం చేయాలని కోరుతూ విన తిపత్రం సమర్పించారు. దీనిపై మంత్రి వివేక్ సానుకూలంగా స్పందించారు. కార్మికుల ఆవేదనను సీఎం రేవంత్‌‌‌‌రెడ్డి దృష్టికి తీసుకెళ్తానని హామీ ఇచ్చారు. ఈ లేబర్ కోడ్ల వల్ల రాష్ట్రంలోని కోటి మందికి పైగా కార్మి కుల బతుకులు రోడ్డున పడే ప్రమాదం ఉందన్నారు. ఈ సందర్భంగా కార్మిక సంఘాల నాయకులు మం త్రికి పలు కీలక అంశాలను వివరించారు.
కేంద్ర సర్కారు మోసం చేస్తున్నది..
‘ఈజ్ ఆఫ్ డూయింగ్ బిజినెస్’ పేరుతో కార్మికులను కేంద్ర ప్రభుత్వం మోసం చేస్తున్నదని, కేవలం మల్టీ నేషనల్‌ కంపెనీల ప్రయోజనాలను కాపాడేందుకే ఈ బిల్లులను తీసుకొచ్చారని మంత్రికి కార్మిక సంఘాల నాయకులు వివరించారు. పని గంటలను 8 నుంచి 12 గంటలకు పెంచుతూ, శ్రమ దోపిడీకి చట్టబద్ధత కల్పిస్తున్నారని విమర్శించారు. కార్మిక వ్యతిరేక లేబర్ కోడ్లను ఇప్పటికే తమిళనాడు, కేరళ, బెంగాల్‌ రాష్ట్రాలు వ్యతిరేకించాయని, ఆయా రాష్ట్రాల అసెంబ్లీల్లో వ్యతిరేకంగా తీర్మానాలు కూడా చేశాయని మంత్రి దృష్టికి తెచ్చారు. తెలంగాణ ప్రభుత్వం కూడా అసెంబ్లీలో తీర్మానం చేసి కేంద్రానికి పంపాలని కోరారు.
ఆర్టీసీలో గుర్తింపు సంఘం ఎన్నికల కోసం వినతి
హైకోర్టు ఆదేశాల మేరకు ఆర్టీసీలో గుర్తింపు సంఘం ఎన్నికలు నిర్వహించాలని స్టాఫ్ అండ్ వర్కర్స్ యూనియన్ కోరింది. ఈ మేరకు మంత్రి వివేక్ వెంకటస్వామిని యూనియన్ ప్రధాన కార్యదర్శి రాజిరెడ్డి, నేతలు గోపాల్, యాదయ్య కలిసి, వినతి పత్రం అందజేశారు. ఆర్టీసీలో తిరిగి యూనియన్ కార్యకలాపాలు ప్రారంభమయ్యేలా చర్యలు తీసుకోవాలని విన్నవించారు. బీఆర్ఎస్ అధికారంలో ఉన్న సమయంలో అప్పటి సీఎం కేసీఆర్ నియంతలా ప్రజాస్వామ్య హక్కులను కాలరాస్తూ రెండేండ్లపాటు ఆర్టీసీలో గుర్తింపు సంఘం ఎన్నికలను రద్దు చేశారని, యూనియన్ల కార్యకలాపాలను కూడా నిషేధించారని పేర్కొన్నారు. దీంతో ఆర్టీసీలో కార్మికుల సమస్యలు పెరిగిపోతున్నాయని, వారి ఇబ్బందులను పట్టించుకునే వారే కరువయ్యారని మంత్రి వివేక్ దృష్టికి తీసుకొచ్చారు.
