ముంబై : మైనర్ను పెళ్లి చేసుకుని, గర్భవతిని చేసిన వ్యక్తిపై ముంబై పోలీసులు రేప్ కేసు నమోదు చేశారు. మైనార్టీ తీరకుండానే పెళ్లి జరిపించిన తల్లి, అబ్బాయి పేరెంట్స్ లనూ బుక్ చేశారు. ముంబై జేజే హాస్పిటల్లో బాలిక ఇటీవల డెలివరీ కావడంతో విషయం వెలుగులోకి వచ్చింది. అగ్రిపాడ పోలీసులు తెలిపిన వివరాల ప్రకారం.. బాలిక తల్లికి పోషించే స్తోమత లేక, కిందటేడాది అదేప్రాంతానికి చెందిన 27 ఏళ్ల వ్యక్తికి ఇచ్చి పెండ్లి చేసింది. తర్వాత బిడ్డను కాపురానికి పంపించింది. ఈ క్రమంలో గర్భం దాల్చిన బాలిక.. జేజే హాస్పిటల్లో ఇటీవలె బిడ్డకు జన్మనివ్వగా డాక్టర్లు బాలిక వయసుపై ఆరా తీశారు. 20 ఏండ్లని అత్తమామలు చెప్పగా.. ఆధార్ కార్డులో 2006లో పుట్టినట్లు ఉంది. దీంతో వాళ్లు పోలీసులకు ఇన్ఫామ్ చేశారు. బాలిక తల్లి, భర్త, అత్తమామలతో పాటు పెళ్లి చేసిన మతపెద్దలపై పోలీసులు కేసు పెట్టారు.
