నేరడిగొండ, వెలుగు: అభివృద్ధి విషయంలో వెనక్కి తగ్గేదే లేదని, ప్రజలకు మెరుగైన సదుపాయాలు అందించేందుకు నిరంతరం కృషి చేస్తానని బోథ్ ఎమ్మెల్యే అనిల్ జాదవ్ అన్నారు. ఆదిలాబాద్ జిల్లా నేరడిగొండ మండల కేంద్రంలో సీఎంటీసీ, జెండర్ రిసోర్స్ సెంటర్ ను శుక్రవారం ఆయన ప్రారంభించారు.
ఈ సందర్భంగా మాట్లాడుతూ... మహిళలు, యువతకు అవసరమైన సేవలు, పరిశోధన, అవగాహన కార్యక్రమాలకు ఈ కేంద్రం ఎంతగానో ఉపయోగపడుతుందన్నారు. మారుతున్న కాలానికి అనుగుణంగా ప్రజలకు అవసరమైన సదుపాయాలను అందుబాటులోకి తీసుకొస్తున్నామని తెలిపారు. ఆయా కార్యక్రమాల్లో ఇన్చార్జి ఏపీఎం లింగరాజు, ఎంపీడీవో గంగాసాగర్ రెడ్డి, మాజీ ఎంపీపీ రాథోడ్ సజన్, వీడీసీ చైర్మన్ ఏలేటి రవీందర్ రెడ్డి తదితరులు పాల్గొన్నారు.
