బాన్సువాడ, వెలుగు : కుటీర పరిశ్రమలను ఏర్పాటు చేసి మహిళలకు ఉపాధి కల్పించేందుకు ప్రభుత్వం కృషి చేస్తోందని ఎమ్మెల్యే పోచారం శ్రీనివాస్రెడ్డి పేర్కొన్నారు. శనివారం బాన్సువాడలోని పాత వీక్లీ మార్కెట్ భవనంలో డ్వాక్రా, మెప్మా మహిళలకు స్వయం ఉపాధిపై అవగాహన సదస్సు నిర్వహించారు. ముఖ్యఅతిథిగా ఎమ్మెల్యే పాల్గొని మాట్లాడారు. కాంగ్రెస్ ప్రభుత్వం మహిళల ఆర్థికాభివృద్ధికి ప్రత్యేక శ్రద్ధ తీసుకుంటుందన్నారు.
హైదరాబాద్ లోని ఓ ప్రైవేటు పరిశ్రమను సంప్రదించి ఫుడ్ ప్రాసెసింగ్ యంత్రాలను తీసుకొచ్చి మహిళలకు అవగాహన కల్పిస్తున్నామని, తర్వాత ఫుడ్ ప్రాసెసింగ్ యూనిట్లను మంజూరు చేయనున్నామన్నారు. మహిళలు తమకు నచ్చిన పరిశ్రమను ఏర్పాటు చేసుకునేందుకు ప్రభుత్వం లోన్లు మంజూరు చేస్తుందన్నారు. ఫుడ్ ప్రాసెసింగ్తోపాటు కాస్మోటిక్స్, వస్త్రాలు, చేతి వృత్తులు తదితర వాటిని ఎంచుకుని స్వయం ఉపాధి పొందాలని సూచించారు. అగ్రోస్ చైర్మన్ కాసుల బాలరాజు, బాన్సువాడ సబ్ కలెక్టర్ కిరణ్మయి తదితరులు పాల్గొన్నారు.
