చెన్నూరు, వెలుగు: చెన్నూరు మండలంలోని శివలింగాపూర్, అక్కేపెల్లి, బావురావుపేట, గంగారం, సుద్దాల, లింగంపెల్లి, ఎర్రగుంటపెల్లిలో కొంతకాలంగా నెలకొన్న తాగునీటి ఇబ్బందులు తొలగిపోయాయి. నీటి కోసం అవస్థలు పడుతున్నామని, బోరు వేసి తమ కష్టాలు తీర్చాలని ఇటీవల ఎమ్మెల్యే వివేక్ వెంకటస్వామికి ఈ గ్రామాల ప్రజలు విజ్ఞప్తి చేశారు. స్పందించిన ఎమ్మెల్యే వెంటనే బోర్లు వేయాలని సంబంధిత అధికారులకు ఆదేశాలు జారీ చేశారు.
ఈ మేరకు అధికారులు ఆది, సోమవారాల్లో ఆయా గ్రామాల్లో బోర్లు వేశారు. దీంతో ఇన్నాళ్లు తాము పడ్డ కష్టాలు తీరాయని ప్రజలు ఆనందం వ్యక్తం చేశారు. ఎమ్మెల్యే వివేక్ వెంకటస్వామికి కృతజ్ఞతలు తెలిపారు. కార్యక్రమాల్లో ఎంపీడీవో మోహన్, ఆర్డబ్ల్యూఎస్ డీఈ విద్యాసాగర్, చెన్నూరు మండల కాంగ్రెస్ నేత అయిత హేమవంతరెడ్డి, నాయకులు తాటి శ్రీనివాస్, భాస్కర్ గౌడ్, రాజ్ కుమార్, రాములు, రమేశ్ పాల్గొన్నారు.
