ఖైరతాబాద్, వెలుగు: ఎస్సీ వర్గీకరణపై ప్రధాని నరేంద్ర మోదీ ఇచ్చిన హామీ మేరకు మాదిగల మద్దతు బీజేపీకేనని మాదిగ రిజర్వేషన్ పోరాట సమితి అధ్యక్షుడు మందకృష్ణ మాదిగ వెల్లడించారు. సోమవారం ఆయన సోమాజిగూడ ప్రెస్క్లబ్లో మీడియాతో మాట్లాడారు. స్వయంగా దేశ ప్రధానే మాదిగల సభకు వచ్చి వర్గీకరణకు కట్టుబడి ఉన్నామని ప్రకటించడం అభినందనీయమన్నారు. దళితుడినే సీఎం చేస్తానని, ప్రతి దళిత కుటుంబానికి మూడెకరాల భూమి ఇస్తామని సీఎం కేసీఆర్ మాటతప్పారన్నారు.
11 శాతం ఉన్న మాదిగలకు మంత్రివర్గంలో స్థానం కల్పించలేదని, ఒక్క శాతం ఉన్న వెలమలకు నాలుగు, రెడ్లకు ఏడు మంత్రి పదవులు ఇచ్చారన్నారు. ఈ ఎన్నికల్లో బీజేపీ మాదిగ సామాజిక వర్గానికి 12 టికెట్లు, ఉపకులాలకు రెండు టికెట్లు ఇచ్చిందన్నారు. కాంగ్రెస్ కూడా మాదిగ వర్గానికి చేసిందేమీ లేదన్నారు. వినతి పత్రం ఇవ్వడానికి వెళ్తే పీసీసీ చీఫ్ రేవంత్రెడ్డి కనీసం మాట్లాడకుండా వెళ్లిపోయారన్నారు. బీసీని సీఎం చేస్తానంటున్న బీజేపీకి ఓటు వేయాలన్నారు.
