మండి: హిమాచల్ ప్రదేశ్లో త్వరలో జరిగే అసెంబ్లీ ఎన్నికల్లో బీజేపీకే మళ్లీ అవకాశం ఇవ్వాలని ఓటర్లు నిర్ణయించుకున్నారని ప్రధాని నరేంద్ర మోడీ అన్నారు. ఉత్తరప్రదేశ్, ఉత్తరాఖండ్లో బీజేపీని గెలిపించినట్లే హిమాచల్ ప్రదేశ్ ప్రజలు ఓటర్లు కూడా అదే సీన్ రిపీట్ చేస్తారని ఆయన పేర్కొన్నారు. మండిలో శనివారం నిర్వహించిన ‘బీజేపీ యువ సంకల్ప్ ర్యాలీ’లో వీడియో కాన్ఫరెన్స్ ద్వారా మోడీ మాట్లాడారు. వాస్తవానికి ఆయన ఈ ర్యాలీకి హాజరు కావాల్సి ఉండగా.. వాతావరణం బాగాలేకపోవడంతో ఆయన పర్యటన రద్దయింది. ‘‘బీజేపీనే స్థిరమైన ప్రభుత్వాన్ని నడపగలదని, రాష్ట్రాన్ని అభివృద్ధి చేసే డైరెక్షన్లో పనిచేస్తదని హిమాచల్ ఓటర్లకు తెలుసు. ఇంతకుముందు దేశంలో సంకీర్ణ ప్రభుత్వాలు ఉండేవి. కానీ మధ్యలోనే ఆ ప్రభుత్వాలు పడిపోయి సుస్థిర పాలనపై ప్రజల్లో సందేహాలు రేకెత్తించాయి. కానీ 2014లో కేంద్రంలో ఏర్పడిన ప్రభుత్వం స్థిరమైన పాలన అందిస్తున్నది. విధానాలను, వర్క్ కల్చర్ను మా ప్రభుత్వం మార్చివేసింది. బలమైన పునాది ఏర్పడడంతో ఇపుడు సాధారణ పౌరుడికి ప్రభుత్వంపై నమ్మకం ఏర్పడింది. అందువల్లే యావత్ ప్రపంచం మనదేశం వైపు చూస్తోంది” అని మోడీ పేర్కొన్నారు.
డ్రోన్ పాలసీని రూపొందించి ఇతర రాష్ట్రాలకు హిమాచల్ప్రదేశ్ స్పూర్తిగా నిలిచిందని ఆయన కొనియాడారు. త్వరలో హిమాచల్ ప్రదేశ్లో పర్యటించి ప్రజలతో ఫేస్ టు ఫేస్ మాట్లాడతానని మోడీ పేర్కొన్నారు. కాగా, మండి ర్యాలీలో వర్షం పడుతున్నా సభకు హాజరైన జనం కుర్చీలనే గొడుగుల్లా వాడి మోడీ ప్రసంగం విన్నారు. బీజేవైఎం నిర్వహించిన ఈ కార్యక్రమానికి వేల మంది హాజరయ్యారు.
