ఈ ఫొటోలో కనిపిస్తున్న బుజ్జి యానిమల్ గినీ పిగ్... ఎలుక జాతికి చెందినది ఇది. దీని స్పెషాలిటీ ఏంటంటే.. బాస్కెట్ బాల్ అంటే భలే ఇష్టం దీనికి. ఇష్టపడటమే కాదు ఆడుతుంది కూడా. ఆశ్చర్యంగా అనిపించినా.. దాని ఆటతో గిన్నిస్ బుక్ ఆఫ్ వరల్డ్ రికార్డ్స్కి ఎక్కింది ఈ గినీ పిగ్. యానిమల్స్కి కూడా గిన్నిస్ బుక్లో చోటు ఉంటుందా? అనే డౌట్ వస్తుంది కదా! అయితే వాటికి కూడా చోటు ఉంటుందని చెప్తున్నారు గిన్నిస్బుక్ వాళ్లు. వాటి స్థాయికి తగ్గట్టుగానే పోటీలు పెడతాం అంటున్నారు. ఇంతకీ ఈ గినీ పిగ్ ఎందుకు రికార్డుల్లోకి ఎక్కిందంటే..
ఈ క్యూట్ గినీ పిగ్ పేరు మోలీ. హంగేరిలోని డోంబోవర్లో యజమాని ఎమ్మా ముల్లర్తో కలిసి ఉంటుంది. దీనికి చిన్నప్పట్నించీ ఆటలంటే ఇష్టమట. బాస్కెట్ బాల్ అంటే ఇంకాస్త ఎక్కువ ఇంట్రెస్ట్ చూపించేదట. అది గమనించిన ముల్లర్, మోలీకి ఆ ఆటలో ట్రైనింగ్ ఇచ్చింది. అదే దాన్ని గిన్నిస్ బుక్ ఆఫ్ వరల్డ్ రికార్డ్స్ వరకు తీసుకెళ్లింది. 30 సెకన్లలో నాలుగు బాస్కెట్ బాల్ స్లమ్ డక్స్ కొట్టింది మోలీ. దానికి సంబంధించిన వీడియోని రీసెంట్గా షేర్ చేసింది గిన్నిస్ బుక్ ఆఫ్ రికార్డ్స్. ఆ వీడియోలో 4.4 సెంటీ మీటర్లున్న మినియేచర్ బాల్ని హూప్లో వేస్తుంటుంది మోలీ. ఆ బాల్ని ముల్లర్ మళ్లీ మునుపటి పొజిషన్లోకి తీసుకొచ్చి.. ‘వెనక్కివెళ్లు మోలీ’ అని అరుస్తుంటుంది. ఆ వెంటనే.. మళ్లీ వెనక్కి వెళ్లి బాల్ తీసుకొచ్చి హూప్లో వేస్తుంది మోలీ. ఈ వీడియోని ఇప్పటికే లక్షలమంది చూశారు.
