సాధారణంగా భూమి పట్టా వ్యక్తుల పేరు మీదనో, లేదంటే ఏదైనా ఛారిటీ, కంపెనీల పేరు మీద ఉండడం అందరికీ తెలిసిందే. కానీ జంతువుల పేరు మీద కూడా భూమి ఉండడం ఎక్కడైనా చూశారా.. ఔను మహారాష్ట్ర ఉస్మానాబాద్‌ జిల్లాలోని ఓ గ్రామంలో కోతుల పేరు మీద ఏకంగా 32 ఎకరాల భూమి ఉంది. ఈ మధ్యకాలంలోనే ఈ విషయం వెల్లడైంది. ఉప్లా గ్రామంలో కోతులను చాలా ప్రేమగా చూసుకుంటారు. వాటి ఆకలి తీరుస్తారు.
ఇటీవల గ్రామ పంచాయతీలోని రికార్డులను పరిశీలించగా కోతుల పేరు మీద భూమి ఉన్న విషయం వెల్లడైంది. దాదాపు 32 ఎకరాల భూమి ఆ గ్రామంలో ఉన్న కోతుల పేరు మీద ఉన్నట్టు గ్రహించిన గ్రామ అధికారులు... దానికి సంబంధించిన పత్రాలను కూడా గుర్తించారు. అయితే వాటిని ఎవరు, ఎప్పుడు రాశారో తెలియదని కూడా ఉన్నాయని గ్రామ సర్పంచ్ చెప్పారు. గతంలో ఆ గ్రామంలో వంద వరకు కోతులు ఉండేవని, ఇప్పుడు వాటి సంఖ్య తగ్గిపోయిందన్నారు. కోతుల పేరిట ఉన్న 32 ఎకరాల్లో అటవీ శాఖ మొక్కలు నాటిందని, గతంలో ఆ భూమిలో ఓ పాడుబడిన ఇల్లు ఉండేదని ప్రస్తుతం అది కూలిపోయిందని చెప్పారు.
