గచ్చిబౌలి, వెలుగు: పెళ్లయి రెండేళ్లవుతున్నా.. పిల్లలు పుట్టడం లేదని అత్తింటివారు వేధించడంతో ఓ వివాహిత సూసైడ్ చేసుకుంది. గచ్చిబౌలి పోలీసులు తెలిపిన వివరాల ప్రకారం.. పెద్దపల్లికి చెందిన కిరణ్, సౌజన్య(27)కు రెండేళ్ల క్రితం వివాహమైంది. దంపతులు నగరానికి వచ్చి టీఎన్జీవో కాలనీలో నివాసం ఉంటున్నారు. కిరణ్ సాఫ్ట్వేర్ ఉద్యోగి. పెండ్లికి ముందు సౌజన్య ఉద్యోగం చేయాల్సిన అవసరం లేదని భర్తతోపాటు అత్త మల్లీశ్వరి అన్నారు. తర్వాత ఆమెకు ఇష్టం లేకపోయినా ఉద్యోగం చేయించారు.
ఈ క్రమంలో 2 నెలలుగా పిల్లలు పుట్టడం లేదంటూ నిత్యం సూటిపోటి మాటలు అంటుండటంతో ఆమె తీవ్ర మనోవేదనకు గురైంది. సోమవారం సాయంత్రం ఇంట్లోనే ఫ్యాన్కు ఉరేసుకొని ఆత్మహత్య చేసుకుంది. కుటుంబసభ్యులు డయల్ 100కు ఫోన్ చేయగా పోలీసులు వచ్చి సౌజన్య మృతదేహాన్ని పోస్టుమార్టం నిమిత్తం ఉస్మానియా దవాఖానకు తరలించారు. మృతురాలి తల్లి రాజేశ్వరి ఫిర్యాదు మేరకు కేసు దర్యాప్తు చేస్తున్నట్లు పేర్కొన్నారు.
