నల్గొండలో చేరికలు అక్కర్లేదు : కోమటిరెడ్డి వెంకట్రెడ్డి

కేసీఆర్కు దమ్ముంటే బీసీని సీఎం అభ్యర్థిగా ప్రకటించాలి
బీసీలను రేవంత్ అవమానించలేదు
బీఆర్ఎస్ నేతలు డ్రామాలాడుతున్నరు
ధరణితో లక్షల మంది రైతులు ఇబ్బంది పడుతున్నరని వ్యాఖ్య

హైదరాబాద్, వెలుగు: నల్గొండ జిల్లా నుంచి కొత్తగా ఎవరూ కాంగ్రెస్లో చేరాల్సిన అవసరం లేదని ఆ పార్టీ ఎంపీ కోమటిరెడ్డి వెంకట్ రెడ్డి అన్నారు. జిల్లాలోని 12 అసెంబ్లీ సీట్లకు 12 సీట్లు ఇప్పటికే రిజర్వ్ అయ్యాయని, అన్ని సీట్లలోనూ కాంగ్రెస్ పార్టీనే గెలుస్తుందని ధీమా వ్యక్తం చేశారు. వేముల వీరేశం కాంగ్రెస్లో చేరుతున్నారన్న వార్తల నేపథ్యంలో ఆయన వ్యాఖ్యలు ప్రాధాన్యం సంతరించుకున్నాయి. వేముల వీరేశం, శశిధర్రెడ్డి పార్టీలో చేరే అంశం ఇప్పటివరకైతే చర్చకు రాలేదని వెంకట్రెడ్డి తెలిపారు. బుధవారం ఆయన తన ఇంటి వద్ద మీడియాతో మాట్లాడారు. కాంగ్రెస్లోని అందరం కలసికట్టుగా బస్సు యాత్ర నిర్వహించాలన్నది తన ఉద్దేశమని చెప్పారు. వచ్చే నెల నుంచి ఎన్నికల కార్యాచరణకు మరింత పదును పెడ్తామన్నారు. ఇకపై సీనియర్ నేతలందరి ఇండ్లల్లోనూ వరుస సమావేశాలను నిర్వహిస్తామని స్పష్టం చేశారు. బీసీలను కాంగ్రెస్ ఎప్పుడూ అవమానించలేదని, బీసీలను అవమానించారంటూ బీఆర్ఎస్ నేతలు డ్రామాలాడుతున్నారని ఆయన మండిపడ్డారు. కేసీఆర్కు దమ్ముంటే వచ్చే ఎన్నికల్లో కేటీఆర్ను కాకుండా బీసీ నేతను సీఎం అభ్యర్థిగా ప్రకటించాలని సవాల్ విసిరారు. ‘‘పీసీసీ చీఫ్ను పట్టుకుని ఇష్టమొచ్చినట్టు మాట్లాడితే దానికే రేవంత్ కౌంటర్ ఇచ్చారు తప్ప బీసీలను అవమానించలేదు. అన్ని కులాలు, మతాలను గౌరవించే సెక్యులర్ పార్టీ కాంగ్రెస్. అన్ని వర్గాలకూ న్యాయం చేసిన పార్టీ కాంగ్రెస్సే” అని ఆయన తెలిపారు.

యుద్ధం ఇక వంద రోజులే

ఎన్నికల యుద్ధానికింక వంద రోజులే ఉందని, ఆ యుద్ధంలో ఎట్టిపరిస్థితుల్లో కాంగ్రెస్ గెలవాలని కోమటిరెడ్డి వెంకట్రెడ్డి అన్నారు. దానికి సంబంధించిన రోడ్ మ్యాప్పై చర్చించేందుకే ముఖ్య నేతలతో తన ఇంట్లో సమావేశం ఏర్పాటు చేసినట్లు చెప్పారు. గెలవాల్సింది కాంగ్రెస్ పార్టీ ఒక్కటే కాదని, గెలవాల్సింది ప్రజలని ఆయన అన్నారు. ప్రజలు గెలవాలంటే పార్టీలోని నాయకులంతా ఐక్యంగా ఉండాల్సిన అవసరం ఉందని చెప్పారు. తామందరి లక్ష్యం 4 కోట్ల మంది ప్రజలను నియంత పాలన నుంచి విముక్తి కల్పించడమేనన్నారు. సమావేశంలో భాగంగా ఎన్నికల యాక్షన్పై చర్చించామని వివరించారు. రాష్ట్ర బడ్జెట్, ఆదాయం ప్రకారమే కాంగ్రెస్ మేనిఫెస్టో ఉంటుందని, దాన్ని అమలు చేస్తామని తెలిపారు. కేసీఆర్లాగా వంద హామీలిచ్చి వదిలేయబోమని అన్నారు. ధరణిని తీసుకొచ్చి పేదల భూములను కబ్జా చేస్తున్నారని మండిపడ్డారు. పది లక్షల మంది రైతులు రుణమాఫీకాక ఇబ్బంది పడుతున్నారని, లక్షలాది మంది రైతులు ధరణితో కష్టాలు పడుతున్నారని ఆయన అన్నారు. రాష్ట్రంలో ప్రతి స్కీమ్లోనూ కమీషన్లను దండుకుంటున్నారని, ఎన్నికల కోసం దళితబంధు పథకాన్ని పెట్టి మోసం చేయాలని చూస్తున్నారని ఆరోపించారు. దళితబంధులో 40 శాతం కమీషన్ తీసుకుంటున్నారని, బీసీ సాయంలోనూ దండుకుంటున్నారని దుయ్యబట్టారు. ‘‘సమావేశంలో ఎన్నో విషయాలను చర్చించినం. అవన్నీ ఇప్పుడే చెప్పేస్తే సీఎం కేసీఆర్ ప్రగతిభవన్ను ఖాళీ చేసి ఫామ్హౌస్కు వెళ్లిపోతడు” అని కోమటి రెడ్డి వెంకట్ రెడ్డి అన్నారు.

బీఆర్ఎస్కు ఆదరణ తగ్గింది: సంపత్ కుమార్

త్వరలోనే పీఏసీ సమావేశం నిర్వహిస్తామని ఏఐసీసీ కార్యదర్శి సంపత్ కుమార్ తెలిపారు. సమావేశంలో అనేక రాజకీయ అంశాలను చర్చించామన్నారు. ఈ నెల 30న కొల్లాపూర్లో భారీ బహిరంగ సభ నిర్వహిస్తామని, ఆ సభకు ప్రియాంకా గాంధీ హాజరవుతారని ఆయన చెప్పారు. గ్రామ స్థాయిలో బీఆర్ఎస్కు ఆదరణ తగ్గిందన్నారు.