ములుగు/ తాడ్వాయి, వెలుగు: వచ్చే ఏడాది జనవరి 28 నుంచి 31వరకు జరిగే మేడారం మహాజాతర లో భక్తులకు ఎలాంటి ఇబ్బందులు తలెత్తకుండా మెరుగైన వైద్యసేవలు అందించాలని ములుగు కలెక్టర్ దివాకర సూచించారు. శుక్రవారం సాయంత్రం కలెక్టరేట్ లో సమ్మక్క సారలమ్మ మేడారం జాతర -2026 ముందస్తు ప్రణాళిక తయారులో భాగంగా వైద్యారోగ్యశాఖ సిబ్బందితో ఆయన సమీక్ష నిర్వహించారు. జాతరలో 30 ఉచిత వైద్య శిబిరాలను ఏర్పాటు చేసి, కావాల్సిన వసతులను సమకూర్చుకోవాలని తెలిపారు.
108 అంబులెన్స్లను అందుబాటులో ఉంచుకోవాలని చెప్పారు. అనంతరం డీఎంహెచ్వో గోపాల్ రావు మాట్లాడుతూ జాతీయ ఆరోగ్య కార్యక్రమాల్లో ప్రభుత్వ నిర్దేశించిన లక్ష్యాలను సాధించడంలో ములుగు జిల్లాను ముందు వరుసలో ఉంచాలని వైద్యాధికారులను కోరారు. కాగా, జిలాలోని 9 ఆశ్రమ పాఠశాలలకు బీఈఎల్ (భారత్ ఎలక్ట్రానిక్స్ లిమిటెడ్) ఆధ్వర్యంలో కార్పొరేట్సోషల్రెస్పాన్సిబిలిటీ ద్వారా డిజిటల్ క్లాస్రూమ్ పరికరాలను సమకూర్చారు.
కలెక్టర్ సమక్షంలో ములుగు మండలం జగ్గన్నపేట బాలికల ఆశ్రమ పాఠశాలకు పరికరాలను అందజేశారు. దీంతో విద్యార్థులు కలెక్టర్కు బొకే అందజేసి కృతజ్ఞతలు తెలిపారు. ఇదిలాఉండగా, తాడ్వాయి మండలంలోని సమ్మక్కసారలమ్మ ఆలయ పునర్నిర్మాణ పనులను కలెక్టర్ పరిశీలించారు. పనులు సకాలంలో పూర్తి చేయాలని అధికారులను, కాంట్రాక్టర్లను ఆదేశించారు.
