- బహిరంగ సభకు భారీగా తరలివచ్చిన జనం
- కాషాయమయమైన మునుగోడు
- సభ సక్సెస్తో బీజేపీ శ్రేణుల్లో ఉత్సాహం
మునుగోడు, వెలుగు: మునుగోడు సభ సక్సెస్తో బీజేపీలో నయా జోష్ కనిపించింది. ఆదివారం నిర్వహించిన బహిరంగసభకు కేంద్ర హోంమంత్రి అమిత్షా హాజరుకావడంతో బీజేపీ శ్రేణుల్లో ఉత్సాహం నెలకొంది. వచ్చే అసెంబ్లీ ఎన్నికలకు మునుగోడు బైపోల్ను బీజేపీతో సహా అధికార టీఆర్ఎస్, ప్రతిపక్ష కాంగ్రెస్సెమీ ఫైనల్ గా భావిస్తున్నాయి. దీంతో ఈ సభను బీజేపీ ప్రతిష్టాత్మకంగా తీసుకుంది. సభకు మునుగోడు నియోజకవర్గంతోపాటు ఉమ్మడి నల్గొండ జిల్లా వ్యాప్తంగా బీజేపీ కార్యకర్తలు, జనాలు భారీగా తరలివచ్చారు. ముఖ్యంగా తాజా మాజీ ఎమ్మెల్యే కోమటిరెడ్డి రాజగోపాల్రెడ్డి అనుచరులు పెద్ద సంఖ్యలో మీటింగ్ కు హాజరయ్యారు. రాష్ట్రంలోని బీజేపీ ఎంపీలు, ఎమ్మెల్యేలు, ఇతర ప్రజాప్రతినిధులు తమ ప్రసంగాలతో పబ్లిక్ను ఉత్తేజపరిచారు. కార్లు, ఇతర వాహనాల్లో కార్యకర్తలు ఉత్సాహంగా సభకు తరలివచ్చారు. లీడర్ల ఫ్లెక్సీలతో మునుగోడు కాషాయమయమైంది.
బీజేపీలో చేరిన లీడర్లు, కార్యకర్తలు
మీటింగ్లో రాజగోపాల్ రెడ్డితోపాటు, నియోజకవర్గంలో పలువురు నాయకులు, రాష్ట్రంలో వివిధ ప్రాంతాలకు చెందిన లీడర్లు అమిత్షా సమక్షంలో పార్టీలో చేరారు. రాజగోపాల్రెడ్డి ముఖ్య అనుచరుడు మునుగోడు పీఏసీఎస్ చైర్మన్, డీసీసీబీ డైరక్టర్ కుంభం శ్రీనివాస్రెడ్డి, ఆలేరు మార్కెట్ కమిటీ మాజీ చైర్మన్ పడాల శ్రీనివాస్ అమిత్షా సమక్షంలో కాషాయకండువా కప్పుకున్నారు.
