న్యూఢిల్లీ: కేంద్ర కేబినెట్ ఏర్పాటు విషయంలో చివరి వరకు సస్పెన్స్ కొనసాగింది. ప్రమాణస్వీకారోత్సవానికి కొన్ని గంటల ముందు ఎంపీలకు ఫోన్లు వెళ్లాయి. స్వయంగా బీజేపీ చీఫ్ అమిత్ షానే పలువురికి ఫోన్లు చేసి.. ‘కంగ్రాట్స్. మీకు మంత్రి పదవి వచ్చింది. ప్రమాణం చేయడానికి రెడీగా ఉండండి’ అని చెప్పారు. పీఎంవో నుంచి కూడా పలువురికి ఫోన్లు వెళ్లాయి. మంత్రివర్గ కూర్పుపై మోడీ, అమిత్ షా మూడురోజులుగా చర్చల మీద చర్చలు జరిపారు. గురువారం కూడా ఇద్దరు నేతలు పలు దఫాలు సమావేశమయ్యారు. ఎవరెవరకి అవకాశం ఇవ్వాలి? ఎన్డీయేలోని ఏఏ పార్టీకి ఎన్ని బెర్త్లు కేటాయించాలి? ఏ ఏ రాష్ట్రం నుంచి ఎంతమందికి చాన్స్ కల్పించాలి? మొత్తం మంత్రులు ఎంత మంది ఉండాలి? అనే విషయాలపై చర్చించారు. రెండుమూడురోజులుగా కేబినెట్లో వీళ్లు ఉండొచ్చంటూ వార్తలు చక్కర్లు కొట్టినప్పటికీ ఎక్కడా వీరే ఫైనల్ అని చివరి వరకు కన్ఫామ్ కాలేదు.
ఎంపీలను ముందే ప్రిపేర్ చేసిన మోడీ
మంత్రి పదవి వచ్చిందని సాక్షాత్తు పీఎంవో నుంచి ఫోన్ వచ్చినా ఒకటికి రెండుసార్లు చెక్ చేసుకోవాలంటూ ఎన్డీయే నేతగా ఎన్నికైన రోజే ఎంపీలకు నరేంద్ర మోడీ హితవుపలికారు. ప్రధానమంత్రి, మంత్రి.. ఇలా హోదాలు ముఖ్యం కాదని, ఎంపీగా నియోజకవర్గాల సమస్యలపై దృష్టి పెట్టాలన్నారు. ఆశలు పెంచుకోవద్దని, పుకార్లు నమ్మొద్దని సూచించారు. ఈ రకంగా ముందే ఎంపీలందరినీ మోడీ ప్రిపేర్ చేశారు.
మిత్రపక్షాలకు బెర్త్లపై చర్చలు
ఒంటరిగానే బీజేపీ అధికారానికి కావాల్సిన సీట్లను క్రాస్ చేసినప్పటికీ రెండోసారి కూడా ఎన్డీయేగానే పాలన కొనసాగించాలని నిర్ణయించుకున్న నేపథ్యంలో ఆ కూటమిలోని పార్టీలకు ఎన్ని బెర్త్లు కేటాయించాలన్నదానిపై మోడీ, షా చర్చలు జరిపారు. మహారాష్ట్రలో 18 సీట్లు గెలిచిన శివసేన, బీహార్లో 16 సీట్లు గెలిచిన జేడీయూ వంటి పార్టీలకు ఎన్ని మంత్రి పదవులు ఇవ్వాలన్న దానిపై వారు సమాలోచనలు సాగించారు. అయితే.. జేడీయూ మాత్రం ప్రభుత్వంలో చేరబోమని, ఎన్డీయేలోనే ఉంటామని స్పష్టం చేసింది. మొన్నటి కేబినెట్లో పనితీరును బట్టి కొందరు పాత మంత్రులను కొత్త కేబినెట్ అవకాశం కల్పించారు. ప్రతిపక్షంలోని కీలక నేతలను ఎన్నికల్లో ఓడించిన పార్టీ నేతలకు తగిన ప్రాధాన్యం ఇచ్చారు. అందులో అమేథిలో కాంగ్రెస్ చీఫ్ రాహుల్గాంధీని ఓడించిన స్మృతి ఇరానీ, ఒకప్పటి బీజేపీ నేత జశ్వంత్ సింగ్ కుమారుడు మన్వేంద్రసింగ్ను ఓడించిన బర్మర్ ఎంపీ కైలాష్ చౌదరి వంటి వారి పేర్లను కేబినెట్ లిస్టులో ముందుగానే చేర్చినట్లు తెలుస్తోంది.
లోక్సభ ఎన్నికల్లో బీజేపీకి ఎక్కువ సీట్లు తెచ్చిపెట్టిన రాష్ట్రాలపై ప్రత్యేక ఫోకస్ పెట్టి ఆ రాష్ట్రాల్లో ఎవరికి మంత్రి పదవులు ఇవ్వాలనేదానిపై మోడీ, షా చర్చలు సాగించారు. బెంగాల్, ఒడిశాలో పార్టీ బలం పుంజుకున్న నేపథ్యంలో ఆ రాష్ట్రాల్లో ఎవరెవరికి పదవులు ఇవ్వాలనేదానిపైనా చర్చించారు. ఇలా మూడు రోజులపాటు మోడీ, అమిత్ షా చర్చలు జరిపి.. గురువారం మధ్యాహ్నం వరకు లిస్టును ఫైనల్ చేశారు. మీడియాకు మాత్రం ప్రమాణ స్వీకారోత్సవానికి కొన్ని నిమిషాల ముందే ఆ పేర్లను విడుదల చేశారు. మంత్రుల పేర్ల విషయంలో, వారి పోర్టు ఫోలియోల విషయంలో గోప్యతను పాటించారు.