- సీఎం రేవంత్ రెడ్డికి జాతీయ బీసీ దళ్ విజ్ఞప్తి
బషీర్ బాగ్, వెలుగు : మేనిఫెస్టోలో బీసీలకు ఇచ్చిన హామీలను దశలవారీగా నెరవేర్చాలని జాతీయ బీసీ దళ్ అధ్యక్షుడు దుండ్ర కుమారస్వామి కోరారు. సోమవారం ఆయన సెక్రటేరియెట్లో సీఎం రేవంత్ రెడ్డిని కలిసి కొత్త సంవత్సర శుభాకాంక్షలు తెలిపారు. అనంతరం వినతిపత్రాన్ని అందజేశారు. స్థానిక సంస్థల్లో బీసీలకు 42శాతానికి రిజర్వేషన్లు పెంచాలని, ఉపకులాల వారీగా రిజర్వేషన్లను అమలు చేయాలన్నారు. సంచార కులాలకు ప్రత్యేకంగా 5% రిజర్వేషన్లు కల్పించాలని కోరారు.
వివిధ బీసీ కులాలకు ప్రత్యేక ఆర్థిక కార్పొరేషన్ల ను ఏర్పాటు చేయాలని చెప్పారు. ప్రభుత్వం ఏ పథకం చేపట్టినా బీసీలకు మేలు చేసేలా ఉండాల న్నారు. రాష్ట్రంలో కాంగ్రెస్ ప్రభుత్వం వచ్చిన వెంటనే బీసీ కుల గణనను నిర్వహించి..వారికి విద్య, ఉద్యోగ, రాజకీయ రంగాల్లో 42% రిజర్వేషన్లు కల్పిస్తామని రాహుల్ గాంధీ, సీఎం రేవంత్ రెడ్డి హామీ ఇచ్చారని గుర్తుచేశారు. ఆ హామీలను నెరవేరిస్తే బీసీలకు మేలు జరుగుతుందని కుమారస్వామి పేర్కొన్నారు.
