- కొత్త రోస్టర్ విధానంతో పెరిగిన మహిళా కోటా
- మొత్తం పోస్టుల్లో జనరల్ 278, విమెన్కు 225
- ఈడబ్ల్యూఎస్ కోటాలో 43, స్పోర్ట్స్ కోటాలో ఒక్కటే
- ఏడు లోపు ఎక్కడ చదివితే అక్కడ్నే లోకల్
- కొత్త రోస్టర్ పై పలువురు అభ్యర్థుల నిరాశ
హైదరాబాద్, వెలుగు: గ్రూప్ 1లో దాదాపు సగం పోస్టులు మహిళలకు కేటాయించారు. కొత్త రోస్టర్ విధానం అమలు చేస్తుండడంతో వాళ్లకు పోస్టులు భారీగా పెరిగాయి. గ్రూప్ 1 పోస్టుల భర్తీలో కొత్త జోనల్ విధానంతో పాటు కొత్త రోస్టర్ విధానాన్ని టీఎస్పీఎస్సీ అమలు చేస్తోంది. అయితే మొత్తం పోస్టులను పరిగణనలోకి తీసుకోకుండా, ఒక్కో డిపార్ట్మెంట్ను ఒక్కోయూనిట్గా భావించి కొత్త రోస్టర్ అమలు చేస్తోంది. దీంతో మొత్తం 503 పోస్టుల్లో 278 జనరల్, 225 మహిళలకు అలాటయ్యాయి. ప్రతి పోస్టులోనూ కొత్త రోస్టర్ విధానాన్ని అమలు చేస్తుండటంతోనే మహిళా కోటా పెరిగిందని అధికారులు చెబుతున్నారు. కొత్త రోస్టర్అమలుతో కొన్ని కేటగిరీల్లో పోస్టులే లేకుండా పోవడం, కొన్ని కేటగిరీలకు తక్కువ పోస్టులు రావడంతో ఆయా కేటగిరీల అభ్యర్థులు నిరాశ చెందుతున్నారు. బీసీలకు అన్యాయం జరిగిందని పలువురు ఆవేదన వ్యక్తం చేస్తున్నారు.
16 బ్యాక్లాగ్ పోస్టులు...
తొలిసారి గ్రూప్1 పోస్టుల భర్తీలో ఈడబ్ల్యూఎస్ కోటా (10%) అమలు చేస్తున్నారు. దీంతో అగ్రవర్ణ పేదలకు మేలు జరగనుంది. ఈ కోటాలో జనరల్ కేటగిరీలో 30, ఉమెన్స్ కేటగిరీలో 13 పోస్టులు ఉన్నాయి. బీసీ–ఏ, బీసీ–బీ, బీసీ–సీ, బీసీ –డీ, బీసీ–ఈ, ఎస్టీ తదితర కేటగిరీల కంటే ఈడబ్ల్యూఎస్ కేటగిరీలోనే ఎక్కువ పోస్టులు ఉండడం గమనార్హం. దీనికి రోస్టర్ పాయింట్లలో ఈడబ్ల్యూఎస్ 9వ నెంబర్లో ఉండడమే కారణం. మరోపక్క తొలిసారిగా అమలు చేస్తున్న స్పోర్ట్స్ కోటా( 2%)లో ఒకే ఒక్క పోస్టు ఉంది. దీన్ని మల్టీజోన్1లో ఎంపీడీఓ పోస్టుకు ఉమెన్స్కేటగిరీలో కేటాయించారు. కాగా, మొత్తం 503 పోస్టుల్లో 16 బ్యాక్ లాగ్ పోస్టులు ఉన్నాయి.
కీలకంగా మారిన లొకాలిటీ...
కొత్త జోనల్ విధానం ప్రకారం 95% పోస్టులను స్థానికులతోనే భర్తీ చేయనున్నారు. దీంతో గ్రూప్1 పోస్టుల భర్తీలో లొకాలిటీ కీలకంగా మారింది. ఏడో తరగతి లోపు ఎక్కడ చదివితే, అదే జిల్లా లోకల్గా భావిస్తామని టీఎస్ పీఎస్సీ ప్రకటించింది. అందులోనూ నాలుగో తరగతి నుంచి ఏడో తరగతి వరకు పరిగణనలోకి తీసుకోనుంది. ఈ నాలుగు తరగతులు ఎక్కడ చదివితే, ఆ ప్రాంతమే లోకల్ ఏరియాగా గుర్తిస్తారు. అయితే ఇవి మల్టీజోన్ పోస్టులు కాబట్టి.. రాష్ట్రంలో ఏ మల్టీజోన్ పరిధిలో చదివితే, ఆ ప్రాంతంలోనే లోకల్గా మారుతారు.