జపాన్లో నూడిల్స్ చాలా ఇష్టంగా తింటారు. అందులోనూ సోబా నూడిల్స్... ఇవి వాళ్ల ట్రెడిషనల్ ఫుడ్ ఐటమ్. అంటే ఆకలేసినప్పుడు మనం అన్నం తిన్నట్టే వాళ్లకి ఈ నూడిల్స్ అన్నమాట. అంతగా ఇష్టపడే ఈ నూడిల్స్ ధర ఇప్పుడు పెరిగింది. అయితేనేం ఏ వస్తువైనా, ఫుడ్ ఐటమ్ అయినా అప్పుడప్పుడూ ధరలు పెరగొచ్చు. తగ్గొచ్చు. అందులో ఆశ్చర్యం ఏముంది? అంటున్నారా! అదే మరి ట్విస్ట్. గత పదేండ్లలో ఒక్కసారి కూడా సోబా నూడిల్స్ ధర పెరగలేదు. మరి సడెన్గా ఇప్పుడెందుకు పెరిగినట్టు?
సోబా నూడిల్స్ జపాన్ వాళ్లకు ట్రెడిషనల్ ఫుడ్. వాటిని తయారుచేసుకునేది వాళ్లే. కానీ, సోబా నూడిల్స్ తయారుచేయడానికి కావాల్సిన ముడి సరుకు కుట్టు (బక్వీట్) రష్యాలో ఎక్కువగా పండుతుంది. అక్కడి నుంచి జపాన్కు ఎగుమతి అవుతుంది. అయితే ఈ మధ్య రష్యా, ఉక్రెయిన్ యుద్ధం వల్ల ఆ దేశాల నుంచి ఇతర దేశాలకు ఎగుమతి అయ్యే వస్తువులు, పదార్థాల ధరలు పెరిగాయి. దాంతో చాలా దేశాలు తక్కువ మొత్తంలో దిగుమతులు చేసుకుంటున్నాయి. అలాగే రష్యా నుంచి జపాన్ దిగుమతి చేసుకునే బక్వీట్ క్వాంటిటీ కూడా తక్కువ కావడంతో వాటితో తయారు చేసే సోబా నూడిల్స్ ధరలు కూడా పెరిగాయి.
ఇప్పటిది కాదు...
సోబా నూడిల్స్ ఆరోగ్యానికి చాలా మంచిది. ఇందులో క్యాలరీలు తక్కువ. పోషకాలు ఎక్కువ. ప్రొటీన్స్, యాంటీ ఆక్సిడెంట్స్, క్లోరిన్, థయమిన్, రిబోఫ్లేవిన్లు పుష్కలం. శీతాకాలం, ఎండాకాలాల్లో తక్కువ ధరకు దొరికే హెల్దీ ఫుడ్గా ఇది ఫేమస్. దీన్ని వేడివేడిగా, చల్లచల్లగా ఎలాగైనా తినొచ్చు. ఇది ఇప్పటిది కాదు.. ‘టొకుగవ’ (1603 –1867) కాలం నాటిది. అప్పట్లోనే సోబాను తినడం మొదలుపెట్టారు జపనీయులు. జపాన్లోని రెండో అతిపెద్ద ఐలాండ్ ‘హొక్కాయిడొ’లో కూడా బక్వీట్ను పండిస్తారు. ఫ్రెష్ బక్వీట్ని షిన్ – సోబా అంటారు. వాటితో సోబా నూడిల్స్ తయారుచేస్తారు.
