- ఒక సెట్కు బదులు మరో సెట్ ఇచ్చిన నిర్వాహకులు
- ఆందోళనలో 300 మంది
- సెంటర్లో ఆర్డీవో విచారణ
- విద్యార్థుల ప్రశ్నాపత్రాన్ని పరిగణలోకి తీసుకుంటామని ఎన్టీఏ చెప్పిందన్న ఆఫీసర్
ఆసిఫాబాద్, వెలుగు: నీట్ పరీక్షలో అధికారుల నిర్లక్ష్యం 300 మంది స్టూడెంట్స్ భవిష్యత్ను ప్రశ్నార్థకం చేసింది. రాష్ట్రంలో ఆదివారం నిర్వహించిన నీట్ పరీక్షలో భాగంగా కుమ్రంభీం ఆసిఫాబాద్ జిల్లా కేంద్రంలోని మోడల్ స్కూల్లో ఎగ్జామ్సెంటర్ఏర్పాటు చేశారు. ఇక్కడ 323 మంది విద్యార్థులకు 299 మంది పరీక్ష రాశారు. దేశవ్యాప్తంగా విద్యార్థులకు నేషనల్ టెస్టింగ్ఏజెన్సీ అందించిన పేపర్ ఒకటైతే.. ఇక్కడి స్టూడెంట్స్ కు వేరే పేపర్ ఇచ్చారు. పరీక్ష రాసిన తర్వాత ఇంటికి వెళ్లిన స్టూడెంట్స్ ఫ్రెండ్స్ తో పరీక్ష గురించి చర్చిస్తుండగా విషయం బయటపడింది. అంతేగాక యూట్యూబ్ సహా ఆన్లైన్లో పేపర్ కీ చూసే సమయంలో తేడా ఉండడంతో విద్యార్థులు పొరపాటు జరిగిందని గుర్తించారు.
పొరపాటు నిజమే : కో ఆర్డినేటర్ నరేందర్
జరిగిన పొరపాటుపై పరీక్షా కేంద్రం కో ఆర్డినేటర్ నరేందర్ వివరణ కోరగా ఎస్బీఐ, కెనరా బ్యాంక్ ల నుంచి పరీక్షా పత్రాలు తెచ్చామని, అందులో ఎస్బీఐ నుంచి తెచ్చిన పేపర్కు బదులు కెనరా బ్యాంకు నుంచి తీసుకువచ్చిన పేపర్ విద్యార్థులకు ఇవ్వడంతో ఈ పరిస్థితి తలెత్తిందన్నారు. విషయం తెలుసుకున్న ఆర్డీవో లోకేశ్వరరావు సోమవారం పరీక్షా కేంద్రానికి వెళ్లి విచారణ జరిపారు. పరీక్షా కేంద్రంలో నిర్వాహకుల తప్పిదం వల్లే ప్రశ్నాపత్రం మారిందని నిర్ధారణకు వచ్చారు.
ఆందోళన చెందాల్సిన అవసరం లేదు : ఆర్డీవో
విద్యార్థులు ఆందోళన చెందాల్సిన అవసరం లేదని ఆర్డీవో స్పష్టం చేశారు. ఎన్టీఏ అధికారులతో మాట్లాడామని, విద్యార్థులు రాసిన ప్రశ్నాపత్రాన్ని పరిగణలోకి తీసుకుంటామని చెప్పారని తెలియజేశారు. విద్యార్థులు సోమవారం కలెక్టర్ వెంకటేశ్ ధోత్రేను కలిసి తమకు న్యాయం చేయాలని కోరారు.
