- లోక్సభ పోరులోనూ గిరిజనులు కాంగ్రెస్ పార్టీ విజయానికి కృషి చేయాలి
హైదరాబాద్, వెలుగు: లోక్సభ ఎన్నికల ప్రచారంలో భాగంగా ప్రతి పార్లమెంట్ నియోజకవర్గంలో గిరిజనులతో భారీ బహిరంగ సభలు ఏర్పాటు చేయాలని కాంగ్రెస్ పార్టీ రాష్ట్ర ఇన్ చార్జ్ దీపాదాస్ మున్షీ సూచించారు. తండా స్థాయిలోనూ నాయకుల మీటింగులు నిర్వహించాలని పార్టీ నేతలకు పిలుపునిచ్చారు. శనివారం గాంధీ భవన్లో ఆదివాసీ కాంగ్రెస్ పార్లమెంట్ నియోజకవర్గ కో ఆర్డినేటర్ల సమావేశం జరిగింది. ఈ సమావేశానికి ఆదివాసీ కాంగ్రెస్ రాష్ట్ర చైర్మన్ బెల్లయ్య నాయక్ అధ్యక్షత వహించగా.. దీపాదాస్ మున్షీ చీఫ్ గెస్ట్గా హాజరై మాట్లాడారు.
కార్యకర్తలు పార్టీ అభ్యర్థులతో కో ఆర్డినేట్ చేసుకుంటూ సమావేశాలు ఏర్పాటు చేయాలన్నారు. అసెంబ్లీ ఎన్నికల్లో గిరిజనుల సహకారంతోనే కాంగ్రెస్ పార్టీ విజయం సాధించిందని, అదే మాదిరిగా రాహుల్ను ప్రధాన మంత్రిని చేయడానికి లోక్సభ ఎన్నికల్లోనూ సహకరించాలని కోరారు. గిరిజన నాయకులకు ఏ సమస్య ఉన్నా పార్టీ నాయకత్వం చూసుకుంటుందని, అందరితో సమన్వయం చేసుకుంటూ పనిచేయాలని పిలుపునిచ్చారు.
ఎన్నికల అనంతరం గిరిజనులకు ప్రాధాన్యం కల్పిస్తామని ఆమె హామీ ఇచ్చారు. బెల్లయ్య నాయక్ మాట్లాడుతూ.. అసెంబ్లీ ఎన్నికల్లో గిరిజనులు కాంగ్రెస్కు ఓటు వేసి పార్టీ అధికారంలోకి రావడానికి కృషి చేశారో.. అదే విధంగా పార్లమెంట్ ఎన్నికల్లోనూ కృషి చేయాలని కోరారు. ఈ సమావేశంలో ఆదివాసీ కాంగ్రెస్ రాష్ట్ర వైస్ చైర్మన్ ఆర్ రఘు నాయక్, రాష్ట్ర కో ఆర్డినేటర్లు గణేశ్ నాయక్, భిక్షపతి నాయక్, జిల్లాల అధ్యక్షులు పాల్గొన్నారు.