వికారాబాద్, వెలుగు: కారు బోల్తా పడి ఓ వ్యక్తి చనిపోగా.. నలుగురు గాయపడ్డ ఘటన వికారాబాద్ పీఎస్ పరిధిలో జరిగింది. కామారెడ్డి జిల్లా గాంధారికి చెందిన సందీప్ కుమార్, ప్రసాద్, సాయిరామ్, హన్మంతు(32), విక్రమ్ కుమార్ నలుగురు జాతీయ ఉపాధి హామీ స్కీమ్లో ఫీల్డ్ అసిస్టెంట్లుగా పనిచేస్తున్నారు. గురువారం రాత్రి ఈ నలుగురు కారులో గాంధారి నుంచి బయలుదేరి
వికారాబాద్లోని అనంతగిరికి వచ్చారు.
శుక్రవారం ఉదయం అనంత పద్మనాభ స్వామి ఆలయంలో దర్శనం చేసుకున్నారు. తిరిగి అక్కడి నుంచి యాదగిరి గుట్టకు బయలుదేరారు. విక్రమ్ కుమార్ ఓవర్ స్పీడ్గా కారు నడపడంతో వికారాబాద్ పట్టణంలోని కొత్తగడి వద్ద అదుపుతప్పి బోల్తా పడింది. ప్రమాదంలో హన్మంతు తలకు బలమైన గాయాలై అక్కడిక్కడే మృతి చెందాడు. మిగతా నలుగురికి గాయాలు కాగా వారిని దగ్గరలోని హాస్పిటల్కు తరలించారు. కేసు ఫైల్ చేసి దర్యాప్తు చేస్తున్నట్లు పోలీసులు తెలిపారు.
