తొర్రూరు, వెలుగు: మహబూబాబాద్ జిల్లా తొర్రూరు పట్టణంలోని ఓ ప్రైవేట్ స్కూల్లో 5వ తరగతి చదువుతున్న ఇద్దరు విద్యార్థులపై హత్యాయత్నానికి పాల్పడ్డారని పేర్కొంటూ పేరెంట్స్, బంధువులు గురువారం ఆందోళనకు దిగారు. ఈ సందర్భంగా వారు మాట్లాడుతూ పెద్దవంగర మండలం టిక్యాతండా, అన్నారం గ్రామాలకు చెందిన ఇద్దరు విద్యార్థులు తొర్రూరులోని ఆర్యభట్ట స్కూల్ హాస్టల్లో ఉంటూ 5వ తరగతి చదువుతున్నారు.
రెండు రోజుల కింద అర్ధరాత్రి హాస్టల్లో పడుకొని ఉన్న సమయంలో గుర్తు తెలియని వ్యక్తులు తువ్వాలుతో మెడకు ఉరి వేసి హత్య చేసేందుకు యత్నించారు. విద్యార్థులు అరవడంతో వారు అక్కడి నుంచి పరారయ్యారు.
విద్యార్థులు ఈ విషయాన్ని హాస్టల్ వార్డెన్, యాజమాన్యానికి చెప్పినా పట్టించుకోలేదు. దీంతో విద్యార్థులు పేరెంట్స్కు సమాచారం ఇవ్వడంతో గురువారం వారు స్కూల్కు వచ్చి యాజమాన్యాన్ని నిలదీశారు. స్కూల్ ఎదుట ఆందోళనకు దిగారు. విషయం తెలుసుకున్న పోలీసులు ఘటనా స్థలానికి చేరుకొని ఆందోళనకారులకు నచ్చజెప్పి పంపించారు.
