ప్రముఖ సీనియర్ నటుడు చలపతిరావు మృతిపట్ల సీని నటుడు, జనసేన అధినేత పవన్ కళ్యాణ్ సంతాపం తెలిపారు. ఆయన ఆత్మకు శాంతి చేకూరాలని భగవంతుణ్ణి ప్రార్థిస్తున్నానని తెలిపారు. ప్రతినాయకుడి పాత్రల్లోనే కాకుండా క్యారెక్టర్ ఆర్టిస్ట్ గా తనదైన శైలి నటనను చలపతి చూపించరాన్నారు. నిర్మాతగా చలపతిరావు మంచి చిత్రాలు నిర్మించారని పవన్ గుర్తుచేసుకున్నారు. చలపతిరావు కుమారుడు రవిబాబు, కుటుంబ సభ్యులకు పవన్ తన ప్రగాఢ సానుభూతి తెలియజేశారు. తెలుగు సినీ పరిశ్రమలో ఒక తరానికి ప్రతినిధులుగా ఉన్న సీనియర్ నటులు ఒక్కొక్కరుగా కాలం చేయడం దురదృష్టకరమని పవన్ అభిప్రాయపడ్డారు.
78 ఏళ్లున్న చలపతిరావు ఇవాళ తెల్లవారుజామున హైదరాబాద్ లోని తన నివాసంలో గుండెపోటుతో తుదిశ్వాస విడిచారు. గత కొంతకాలంగా అనారోగ్య సమస్యలతో చలపతిరావు బాధపడుతున్నారు. దీంతో ఆయన నటనకు దూరంగా ఉంటున్నారు. రెండు రోజుల క్రితమే సీనియర్ నటులు కైకాల సత్యనారాయణ మృతిచెందగా.. ఇప్పుడు చలపతిరావు ఆకస్మిక మరణంతో టాలీవుడ్‌ చిత్ర పరిశ్రమలో తీవ్ర విషాదం నెలకొంది.
