కోహెడ(బెజ్జంకి), వెలుగు: రైతు ప్రభుత్వం అంటే రైతుల భూములు గుంజుకోవడమేనా అని బీఎస్పీ రాష్ట్ర అధ్యక్షుడు ఆర్.ఎస్.ప్రవీణ్కుమార్ ప్రశ్నించారు. రెండో విడత బహుజన రాజ్యాధికార యాత్రలో భాగంగా సోమవారం ఆయన సిద్దిపేట జిల్లా బెజ్జంకి మండలం రేగులపల్లి, గుగ్గిళ్ల, తోటపల్లి, లక్ష్మీపూర్, గూడెం గ్రామాల్లో పర్యటించారు. తోటపల్లిలో ప్రవీణ్కుమార్ మాట్లాడుతూ.. తోటపల్లి రిజర్వాయర్ పేరుతో 2007లో గుంజుకున్న 1600 ఎకరాల భూములను తిరిగి ఇవ్వకుండా రైతులకు అన్యాయం చేశారని ఆవేదన వ్యక్తం చేశారు. కావేరి సీడ్స్ కంపెనీకి భూమి కేటాయించిన ప్రభుత్వం, రిజర్వాయర్ కోసం సేకరించిన భూములను ఎందుకు తిరిగివ్వడం లేదని నిలదీశారు. అసైన్డ్ భూములను అధికార పార్టీ లీడర్లు పట్టాలు చేసుకుంటున్నారని ఆగ్రహం వ్యక్తం చేశారు. ఇండ్లు లేని పేదలు కమ్యూనిటీ హాళ్లలో ఉంటున్న సంగతి స్థానిక ఎమ్మెల్యేకు కనిపించడం లేదా అని ప్రశ్నించారు.
రాష్ట్రంలో దోచుకున్న సొమ్మును సీఎం కేసీఆర్దేశ వ్యాప్తంగా తిరిగేందుకు ఖర్చు చేయనున్నారని ఆరోపించారు. కేంద్ర, రాష్ట్ర ప్రభుత్వాలకు దమ్ముంటే బీసీ, ఎస్సీ, ఎస్టీ, మైనారిటీల రిజర్వేషన్లు పెంచాలని డిమాండ్ చేశారు. మంత్రి హరీశ్రావు ఊరిలో ఏర్పాటు చేసిన బీఎస్పీ జెండా గద్దెను గుర్తుతెలియని వ్యక్తులు కూల్చడాన్ని తీవ్రంగా ఖండించారు. జెండాలు కూల్చితే త్వరలోనే మీ గడీలు కూలుస్తామని హెచ్చరించారు. ఊళ్లలో అంబేద్కర్ విగ్రహం పెట్టేందుకు పర్మిషన్ ఇవ్వని వారు, తమ అధికారం కోసం సెక్రటేరియట్వద్ద ఏర్పాటు చేస్తామంటున్నారన్నారు. బీఎస్పీ ప్రభుత్వం ఏర్పాటయ్యాక నిరుపేదలకు ఎకరం భూమి, 10 లక్షల ఉద్యోగాలు కల్పిస్తామన్నారు. కార్యక్రమంలో పార్టీ రాష్ట్ర కార్యదర్శి నిశాని రామచంద్రం, జిల్లా అధ్యక్షుడు శ్రీనివాస్, మహిళా కన్వీనర్ సమలత, పాల్గొన్నారు.
