- పోటాపోటీ కార్యక్రమాలతో క్యాడర్ ఆందోళన
- అధిష్టానం ఆశీస్సులున్నాయంటున్న ఆశావహులు
- సిట్టింగ్ లకు తలనొప్పి
పెద్దపల్లి, వెలుగు: పెద్దపల్లి జిల్లాలో మూడు నియోజకవర్గాల్లోని బీఆర్ఎస్ పార్టీలో పరిస్థితి యాస్పిరెంట్లు వర్సెస్ సిట్టింగులుగా మారిపోయింది. హైకమాండ్ ఆత్మీయ సమ్మేళనాలు ఏర్పాటు చేయాలని ఆదేశించింది. జిల్లాకు ఓ ఇంచార్జిని నియమించింది. ఇన్చార్జిని కలుపుకొని సిట్టింగ్ ఎమ్మెల్యేలు ఆత్మీయ సమ్మేళనాలు ఏర్పాటు చేస్తున్నారు. ఈ సమ్మేళనాలకు ఎమ్మెల్యే సీటు ఆశిస్తున్న నాయకులు హాజరు కావడం లేదు. గతంలో మాదిరిగానే వారి సేవా కార్యక్రమాలు కొనసాగిస్తున్నారు. ఈ వ్యవహారం మొదటి నుంచి సిట్టింగులకు రుచించడం లేదు. ఆత్మీయ సమ్మేళన వేదికల మీద డైరక్టుగా సిట్టింగులు మొర పెట్టుకుంటున్నారు. పార్టీ లైన్ తప్పవద్దని, సేవా కార్యక్రమాలు చేసినంత మాత్రాన గెలవరని అది చూసి అధిష్టానం టిక్కెట్ ఇవ్వదని సూచిస్తున్నారు.
యాస్సిరెంట్లు మాత్రం తమకు
హైకమాండ్ ఆశీస్సులున్నాయని, పై వారి సూచనతోనే తాము సేవా కార్యక్రమాలు కొనసాగిస్తున్నామని చెబుతున్నారు. మరోవైపు బీఆర్ఎస్ హైకమాండ్ సిట్టింగులపై సర్వేలు చేయిస్తుండటంతో యాస్పిరెంట్లలో ఆశలు బలపడుతున్నాయి. ఇంతా జరుగుతున్నా హైకమాండ్ మాత్రం రెస్పాండ్ కాకుండా సైలెంట్గా పరిశీలిస్తుండటంతో సిట్టింగులలో భయం
పెరిగిపోతోంది. క్యాడర్ మాత్రం కన్ఫ్యూజ్ అయితుండ్రు.
అదే కథ...
రామగుండంలో సిట్టింగ్ ఎమ్మెల్యే చందర్ సీటుకు ఎసరు పెట్టే విధంగా జడ్పీటీసీ కందుల సంధ్యారాణి డైరెక్ట్ ఎటాక్ చేస్తున్నారు. పోలీసు హౌజింగ్ బోర్డు చైర్మన్ కోలేటి దామోదర్ సామాజిక సమీకరణాలను ముందుకు తీసుకెళ్తూ సైలెంట్గా పావులు కదుపుతున్నారు. రామగుండం నియోజకవర్గం మొదట ఎస్సీ రిజర్వుడ్గా ఉండేది. ఆ తర్వాత జనరల్ సీటుగా మారింది. ఇప్పటి వరకు ఈ నియోజకవర్గం నుంచి ఏ ఒక్క అగ్రవర్ణ నాయకుడు ప్రాతినిధ్యం వహించ లేదు. జనరల్గా మారిన తర్వాత బీసీ వర్గానికి చెందిన సోమారపు సత్యనారాయణ, కోరుకంటి చందర్లే గెలిచారు. అగ్రవర్ణాలకు ఈ సారి రామగుండం టికెట్ ఇచ్చేలా హైకమాండ్పై ఒత్తిడి పెడుతున్నట్లు సమాచారం. అదే జరిగితే బీఆర్ఎస్ నుంచి కోలేటి దామోదర్ బరిలో నిలిచే ఛాన్స్ ఎక్కువగా కనిపిస్తోంది. మంథని నుంచి 2018లో బీఆర్ఎస్ నుంచి పుట్ట మధు ఓడిపోయినప్పటికీ ఆయనకు జడ్పీ చైర్మన్గా అవకాశం ఇచ్చారు.
మంథని నియోజకవర్గ ఇన్చార్జిగా కొనసాగుతున్నారు. ఆయనకు చల్లా నారాయణ రెడ్డి రూపంలో సమస్య వచ్చింది. పుట్ట మధుకు పోటీగా చల్లా నారాయణరెడ్డి ప్రజల్లో తిరుగడంతో పాటు, బీఆర్ఎస్ సీనియర్ నాయకులతో నిత్యం టచ్లో ఉంటున్నారు. ఇటీవల భూపాలపల్లిలో జరిగిన బీఆర్ఎస్ సభలలో కూడా చల్లాకు లభించిన ఇంపార్టెన్స్తో అనుమానాలు బలపడుతున్నాయి. దాసరి మనోహర్రెడ్డి పెద్దపల్లి ఎమ్మెల్యేగా ఉన్నారు. రెండు సార్లు ఎమ్మెల్యేగా గెలిచారు. రెండు ఎన్నికల్లో బీఆర్ఎస్ నుంచి మనోహర్రెడ్డికి రెబల్స్ గొడవ లేదు. 2023 ఎన్నికలు మాత్రం ఆయనకు కత్తిమీద సామయ్యేట్లున్నయి. పెద్దపల్లి నుంచి భానుప్రసాదరావు పోటీలో ఉంటాడేమో అనుమానాలు ఉండేవి. కానీ ఆయన ఎమ్మెల్సీ ఎన్నికల్లో గెలిచారు. ప్రభుత్వ చీప్ విఫ్గా హైకమాండ్ నియమించింది. ఎమ్మెల్యే దాసరి ఎమ్మెల్సీ భానుప్రసాదరావుకు సన్మాన కార్యక్రమం ఏర్పాటు చేశారు.
దీంతో ఎమ్మెల్సీ భానుప్రసాదరావు ' నేను పెద్దపల్లి నుంచి పోటీలో లేను' అని చెప్పారు. కానీ హైకమాండ్ ఎవరికి టికెట్ ఇస్తే వారి గెలుపుకోసం కృషి చేస్తానన్నారు. దీంతో మనోహర్రెడ్డితో పాటు ఆయన అనుచరులు డైలామాలో పడిపోయారు. పెద్దపల్లి నుంచి నల్ల మనోహర్రెడ్డి, బొద్దుల లక్ష్మన్, పెంట రాజేశ్ సీరియస్గా సేవా కార్యక్రమాలు చేస్తున్నారు. ఈద శంకర్రెడ్డి, చిరుమల్ల రాకేశ్ కూడా ఇంటర్నల్గా తమ ప్రయత్నాల్లో ఉన్నట్లు సమాచారం. పెంట రాజేశ్ రామగుండం ఎమ్మెల్యే చందర్కు దగ్గర చుట్టం, జిల్లాకు చెందిన ఓ మంత్రికి అత్యంత సన్నిహితుడు, ఆ మంత్రి ఆశీస్సులతోనే నియోజకవర్గంలో సేవా కార్యక్రమాలు చేస్తున్నట్లు తెలుస్తోంది. దీనిపై ఎమ్మెల్యే దాసరి కూడా గతంలో హైకమాండ్కు ఫిర్యాదు చేసినట్లు సమాచారం.
కంట్రోల్ చేయండి ప్లీజ్..
పెద్దపల్లి, రామగుండం, మంథని బీఆర్ఎస్ నుంచి టికెట్ ఆశిస్తున్న ఆశవహులను కంట్రోల్ చేయాలని ఎమ్మెల్యేలు కోరుతున్నారు. దాసరి మనోహర్రెడ్డి, కోరుకంటి చందర్, మంథని బీఆర్ఎస్ నియోజకవర్గం ఇంఛార్జి పుట్ట మధు జిల్లా మంత్రులతో పాటు హైకమాండ్ను వేడుకుంటున్నారు. యాస్పిరెంట్ల కారణంగా పార్టీకి డ్యామేజ్ జరుగుతోందని, సిట్టింగ్ ఎమ్మెల్యేలు, నియోజకవర్గ ఇన్చార్జిలను విమర్శించడం ద్వారా పార్టీ ప్రతిష్ట దెబ్బతింటుందన్నారు. అలాంటి వారిని అదుపులో పెట్టాలని దాసరి, కోరుకంటి, పుట్టలు వేదిక పైనే మంత్రి గంగులకు విజ్ఞప్తి చేశారు. మంత్రి గంగుల మాత్రం ఎవరినీ నొప్పించకుండా మరోసారి బీఆర్ఎస్ పార్టీని అధికారంలోకి తెచ్చేలా క్యాడర్ కష్టపడాలని సూచించారు.
