నిజామాబాద్‌‌లో కానిస్టేబుల్‌‌ను చంపిన రియాజ్‌‌ ఎలా దొరికాడంటే..

• నగర శివారులో ఓ పాత లారీ క్యాబిన్‌‌లో దాక్కున్న నిందితుడు
• పోలీసులను చూసి పారిపోయేందుకు ప్రయత్నం
• పట్టుకున్న ఆసిఫ్‌‌ అనే యువకుడిపై కత్తితో దాడి
• ఎట్టకేలకు అరెస్ట్‌‌ చేసిన పోలీసులు

నిజామాబాద్, వెలుగు: నిజామాబాద్‌‌లో సీసీఎస్‌‌ కానిస్టేబుల్‌‌ ప్రమోద్‌‌ కుమార్‌‌ను హత్య చేసిన రియాజ్‌‌ అరబ్‌‌ను ఆదివారం పోలీసులు అరెస్ట్‌‌ చేశారు. నగర శివారులోని ఓ పాత లారీ క్యాబిన్‌‌లో దాక్కున్నట్లు తెలియడంతో అక్కడికి వెళ్లి అదుపులోకి తీసుకున్నారు. కానిస్టేబుల్‌‌ చంపి పారిపోయిన రియాజ్ను పట్టుకునేందుకు స్పెషల్‌‌ టీమ్స్‌‌ను ఏర్పాటు చేయడంతో వారు ఎక్కడికక్కడ గాలింపు ముమ్మరం చేశారు. నిజామాబాద్‌‌ శివారులోని బాబన్‌‌సాబ్‌‌ పహాడ్‌‌, సారంగాపూర్‌‌ ఏరియాలో రియాజ్‌‌ ఉన్నట్లు తెలియడంతో పోలీసులు అటువైపు ఫోకస్‌‌ చేశారు. ఈ విషయం తెలుసుకున్న రియాజ్‌‌ శనివారం రాత్రి పోలీసులకు చిక్కకుండా తప్పించుకొని నగర శివారులోని ఓ రియల్‌‌ ఎస్టేట్‌‌ వెంచర్‌‌కు సమీపంలో ఉన్న పాత లారీ క్యాబిన్‌‌లో దాక్కున్నాడు. ఆదివారం ఉదయం సమాచారం అందుకున్న పోలీసులు అటువైపు వెళ్లారు. పోలీసుల రాకను గమనించిన రియాజ్‌‌ పారిపోయేందుకు ప్రయత్నించగా.. దగ్గర్లోనే ఉన్న బైక్‌‌ మెకానిక్‌‌ ఆసిఫ్‌‌ పట్టుకున్నాడు. దీంతో రియాజ్‌‌ కత్తితో ఆసిఫ్‌‌ను గాయపర్చాడు.

ఇద్దరి మధ్య పెనుగులాట జరగడంతో రియాజ్‌‌కు సైతం గాయాలు అయ్యాయి. ఇదే టైంలో అక్కడుకు చేరుకున్న పోలీసులు రియాజ్‌‌ను అదుపులోకి తీసుకొని ట్రీట్‌‌మెంట్‌‌ కోసం తమ వాహనంలో జీజీహెచ్‌‌కు తరలించారు. అక్కడి నుంచి తప్పించుకునేందుకు వీలు లేకుండా సాయుధ పోలీసులను నియమించారు. రియాజ్‌‌ను పట్టుకోబోయి గాయపడిన ఆసిఫ్‌‌కు ట్రీట్‌‌మెంట్‌‌ ఇప్పించి పంపించారు. తనను ఎన్‌‌కౌంటర్‌‌ చేస్తారని ప్రచారం జరగడంతో.. తాను ఉన్న ప్రతీ ప్లేస్‌‌కు కొద్దిదూరంలో తన గ్యాంగ్‌‌లోని ఓ సభ్యుడిని పెట్టి పోలీసులు తనను పట్టుకోగానే వీడియో తీసి వైరల్‌‌ చేయాలని సూచించినట్లు సమాచారం. ఆ క్రమంలోనే రియాజ్‌‌ పట్టుబడినట్లు ఓ వీడియో వైరల్‌‌ అవుతోంది.