పాలిటెక్నిక్ క్వశ్చన్​ పేపర్ లీక్ చేసింది వీరే..

• స్వాతి పాలిటెక్నిక్ కాలేజీ నిర్వాహకులే ఈ నేరానికి పాల్పడ్డారు

ఎల్ బీ నగర్, వెలుగు: పాలిటెక్నిక్ క్వశ్చన్​ పేపర్ లీకేజీ కేసులో పోలీసులు నలుగురిని అదుపులోకి తీసుకున్నారు. స్వాతి పాలిటెక్నిక్ కాలేజీ నిర్వాహకులు ఈ నేరానికి పాల్పడినట్లు తెలిపారు. స్టూడెంట్ల సంఖ్య తగ్గడంతో కాలేజీ పేరు ప్రఖ్యాతలు పెంచడానికి ఈ ప్లాన్ చేసినట్లు తేల్చారు. స్వాతి కాలేజీ అడ్మిన్ ఆఫీసర్ గిడ్డ కృష్ణమూర్తి(57), చీఫ్ సూపరింటెండెంట్ వెంకటేశ్వర్లు(31), జాయింట్ సూపరింటెండెంట్ కేశెట్టి కృష్ణమోహన్​(28), అబ్జర్వర్(గవర్నమెంట్ కెమిస్ట్రీ లెక్చరర్) వెంకట్రామ్​రెడ్డి(47)ని పోలీసులు మంగళవారం అరెస్ట్ చేశారు.
వాట్సాప్​ షేరింగ్​లతో..
ఈనెల 8,9 తేదీల్లో పేపర్ లీక్ అయినట్లు టెక్నికల్ బోర్డ్ సెక్రటరీ ఫిర్యాదు చేయడంతో ఈ ఘటన వెలుగులోకి వచ్చింది. పై రెండు తేదీల్లో స్వాతి కాలేజీ మేనేజ్​మెంట్అరగంట ముందే వాట్సాప్​లో క్వశ్చన్ పేపర్​ను తమ స్టూడెంట్లకు పంపించింది. వాళ్లు ప్రశ్నాపత్రాన్ని ఇతర కాలేజీల్లో ఉండే ఫ్రెండ్స్‌కు షేర్ చేశారు. మెదక్ జిల్లా చేగుంటలోని పాలిటెక్నిక్ కాలేజీ స్టూడెంట్లు 8వ తేదీన పరీక్షకు అరగంట లేటుగా వచ్చారు.- 9న కూడా పరీక్ష హాల్​లో ఎవరూ కనిపించకపోవడంతో అనుమానం వచ్చిన అబ్జర్వర్ ఎగ్జామ్ సెంటర్ ఆవరణలోని చెట్ల కింద స్టూడెంట్లు గుమిగూడి ఉండటాన్ని గమనించి, ఫోన్ పరిశీలించగా పేపర్ లీక్ అయినట్లు బయటపడింది. వెంటనే టెక్నికల్ బోర్డ్ ఆఫీసర్లకు విషయం చెప్పాడు. ప్రశ్నాపత్రంలోని కోడ్​ఆధారంగా స్వాతి కాలేజీ నుంచి పేపర్ లీకైనట్లు గుర్తించి పోలీసులకు ఫిర్యాదు చేశారు.