సిద్దిపేట రూరల్, వెలుగు: పోలింగ్ సిబ్బందికి పూర్తి స్థాయిలో శిక్షణ ఇవ్వాలని జిల్లా ఎన్నికల అధికారి, కలెక్టర్ ప్రశాంత్ జీవన్ పాటిల్ సూచించారు. శుక్రవారం కలెక్టర్ ఆఫీస్లో ఎన్నికల రిసోర్స్ పర్సన్స్ కు అవగాహన కల్పించారు. ఈ సందర్భంగా ఆయన మాట్లాడుతూ.. ఎన్నికల నిర్వహణలో పాల్గొనే ప్రతి ఒక్క అధికారికి విధుల పట్ల పూర్తిస్థాయిలో అవగాహన ఉండాలన్నారు. ఎన్నికల సంఘం నిబంధనల మేరకు గుర్తింపు పొందిన రాజకీయ పార్టీల సమక్షంలో ఈవీఎంల మొదటి రాండమైజేషన్ పూర్తి చేసినట్లు తెలిపారు.
జిల్లాలోని 4 అసెంబ్లీ స్థానాల పోలింగ్ కేంద్రాలకు అదనంగా 25% బ్యాలెన్సింగ్ యూనిట్లు, కంట్రోల్ యూనిట్లను, 40% వీవీ ప్యాట్లను కేటాయించామన్నారు. ఓటర్ జాబితాలో మీ పేరు ఉందో లేదో తెలుసుకునేందుకు voters.eci.gov.in వెబ్సైట్ని సందర్శించి తెలుసుకోవచ్చన్నారు. కార్యక్రమంలో అడిషనల్ కలెక్టర్ శ్రీనివాస్ రెడ్డి, ఎలక్షన్ సూపరింటెండెంట్ రామేశ్వర్, రాజకీయ పార్టీల ప్రతినిధులు మోహన్ లాల్, ఎండీ ఇమాముద్దీన్, శ్రీనివాస్, ఎండీ మునీర్, యాదగిరి పాల్గొన్నారు.
