- ఏడాదికి రూ.3 వేలు లేదంటే 200 ట్రిప్పులు
- ఒక్కో టోల్ గేట్ క్రాస్.. ఒక్కో ట్రిప్ కింద లెక్క
- రాజ్మార్గ్ యాత్ర యాప్ ద్వారా రిజిస్టర్
- వైట్ నంబర్ ప్లేట్ వెహికల్స్కు మాత్రమే వర్తింపు
హైదరాబాద్, వెలుగు: టోల్గేట్ యాన్యువల్ పాస్ శుక్రవారం నుంచి అందుబాటులోకి వచ్చింది. ఏడాదికి 200 టోల్ క్రాసింగ్లు లేదంటే రూ.3వేలు చెల్లించి సంవత్సరం పాటు నేషనల్ హైవేలపై ప్రయాణించే అవకాశాన్ని కేంద్రం కల్పించింది. ఈ లెక్కన ఒక్కో టోల్ప్లాజాకు రూ.15 ఫీజు చెల్లించినట్లు అవుతుంది. స్వాతంత్ర్య దినోత్సవాన్ని పురస్కరించుకుని ఈ పాస్ను అందుబాటులోకి తీసుకొచ్చింది. ఒక టోల్ గేట్ క్రాస్ అయితే.. దాన్ని ఒక ట్రిప్ కింద లెక్కిస్తామని ఎన్హెచ్ఏఐ అధికారులు తెలిపారు. వైట్ నంబర్ ప్లేట్ వెహికల్స్కు మాత్రమే ఈ యాన్యువల్ పాస్ వర్తిస్తుంది.
ఎలా రిజిస్టర్ చేసుకోవచ్చు?
- పాస్ తీసుకోవాలంటే.. ముందుగా ప్లే స్టోర్ నుంచి రాజ్మార్గ్ యాత్ర యాప్ను డౌన్లోడ్ చేసుకోవాలి.
- నేషనల్ హైవే అథారిటీ ఆఫ్ ఇండియా (ఎన్ హెచ్ఏఐ) వెబ్ సైట్ నుంచి కూడా ఈ పాస్ తీసు కోవచ్చు. మొబైల్ నంబర్ ఎంటర్ చేస్తే ఓటీపీ వస్తుంది. తర్వాత యాప్ ఓపెన్ అవుతుంది.
- లాంగ్వేజ్ సెలక్ట్ చేసుకోవాలి. తర్వాత యాన్యువల్ పాస్ ను సెలక్ట్ చేసుకోవాలి.
- కమర్షియల్ వెహికల్స్, కారు, జీప్, యాక్టివ్ ఫాస్ట్యాగ్ ఉన్నవాళ్లే అర్హులని చూపిస్తుంది.
- తర్వాత దేశవ్యాప్తంగా ఉన్న నేషనల్ హైవేలపై ఉన్న టోల్ ప్లాజా మ్యాప్ ప్రత్యక్షం అవుతుంది. ఒక టోల్ ప్లాజాను సెలెక్ట్ చేసుకున్న తర్వాత సింగిల్ జర్నీకి ఎంత, రిటర్న్ జర్నీకి ఎంత, నెల పాస్ ఎంత అనే వివరాలు కనిపిస్తాయి.
- తర్వాత వెహికల్ నంబర్ ఎంటర్ చేస్తే పేమెంట్ మోడల్ లోకి వెళ్తాం. యూపీఐ, డెబిట్, క్రెడిట్ కార్డు ద్వారా పేమెంట్ చేయాలి. సక్సెస్ఫుల్ అని వస్తది.
- ఎక్స్ ప్రెస్ వేపై ఎన్ని టోల్ ప్లాజాలు ఉన్నా.. ఎగ్జిట్ దగ్గర టోల్ కట్ అవుతుంది. అప్పుడు ఇది ఒకే ట్రిప్ కిందికి వస్తుంది.
- రాష్ట్ర వ్యాప్తంగా నేషనల్ హైవేస్, స్టేట్ హైవేస్ కలిపి మొత్తం 36 టోల్ ప్లాజాలు ఉన్నాయి. హైదరాబాద్, విజయవాడ నేషనల్ హైవే ఎన్ 65 మీద 3 ఉండగా (2 తెలంగాణ, ఒకటి ఏపీ). హైదరాబాద్ – బెంగళూరు హైవే ఎన్ హెచ్ 44 మీద 3, హైదరాబాద్– నాగ్పూర్ నేషనల్ హైవే 44 మీద అత్యధికంగా 5 టోల్ ప్లాజాలు ఉన్నాయి.
ఆర్థిక భారం తగ్గించేందుకే..
టోల్ ఫీజుల నుంచి ప్రయాణికులపై ఆర్థిక భారం తగ్గించేందుకే కేంద్ర ప్రభుత్వం యాన్యువల్ పాస్ తీసుకొచ్చింది. ఆన్లైన్లోనే పాస్ కొనాలి. ఫాస్టాగ్ ఉన్నవాళ్లు అదే ఉపయోగించొచ్చు. ఎక్కువ జర్నీ చేసేవారికి ఈ పాస్ ఉపయోగకరంగా ఉంటుంది. టోల్ప్లాజాల వద్ద కూడా ఎలాంటి ఇబ్బంది ఉండదు.
200 ట్రిప్లు ఫ్రీగా ఉంటాయి. టోల్ప్లాజాల వద్ద పాస్ ఇచ్చే సెంటర్లను ఇంకా ఏర్పాటు చేయలేదు. డిమాండ్ను బట్టి టోల్ ప్లాజాల వద్ద యాన్యువల్ పాస్ కౌంటర్లు ఏర్పాటు చేస్తాం. ట్రిప్కు యావరేజ్గా రూ.15 మాత్రమే కట్ అవుతుంది.
శివ శంకర్, తెలంగాణ రీజినల్ ఆఫీసర్, ఎన్హెచ్ఏఐ
