చైనా వాళ్లకు కొవిడ్ తీసుకొచ్చిన కష్టాలు అన్నీ ఇన్నీ కావు. సరుకులు కొందామంటే షాపులు బంద్. ఇంట్లో వాళ్లను కల్వకుండా క్వారెంటైన్లో బందీ. ఊరు దాటి పోకుండా ఇండ్లల్లనే చెర. ఒక్కటి కాదు.. రెండు కాదు.. వాళ్ల బాధ మాటల్లో చెప్పడం కష్టం. ఇవన్నీ కొవిడ్ ఇంకొకళ్లకు అంటకుండా చైనా తీసుకుంటున్న జాగ్రత్తలు మరి. అవే కాదు, మరికొన్ని ఆసక్తికరమైన చర్యలూ చేపట్టింది. అందులో ఇవి కొన్ని.
రేయింబవళ్లు.. సూట్లు కుట్టు
కొవిడ్ అంటకుండా ఎన్నెన్నో జాగ్రత్తలు తీసుకుంటున్నం. మాస్కులు పెట్టుకుంటున్నం. చేతులకు గ్లోవ్స్ తొడుక్కుంటున్నం. ఒంటికి రక్షణ కవచం లాంటి సూట్లు వేసుకుంటున్నం. మరి, ఎంతమందికని ఉన్న సూట్లు సరిపోతయి. అందుకే, చైనా హెబి ప్రావిన్స్లోని నింగ్జిన్ కౌంటీలో ఉన్న ఓ వర్క్షాప్లో వర్కర్లు రేయింబవళ్లు సూట్లు కుడుతూనే ఉన్నరు. కుట్టిన సూట్లకు ఇట్టే గిరాకీ తగులుతోంది. స్టాకు ఖాళీ అవుతోంది. వర్కర్లకు చేతి నిండా రెస్ట్ లేని పని దొరుకుతోంది.
అమ్మేటోళ్లుండరు.. మనమే కూరలు తీస్కోవాలె
ఎంత కొవిడ్ వచ్చినా కడుపు నిండనిది పని జరగదు. కడుపు నిండాలంటె.. వంట వండాలె. దానికి కూరలు తేవాలె. కూరగాయల దుకాణాలైతే ఓపెన్ ఉన్నయిగానీ, అమ్మేటోళ్లే లేరే. అయినా, ఏం ఫర్వాలేదు. అక్కడ పైసలు పెట్టి ఎవరికి కావాల్సిన కూరగాయలు వాళ్లు పట్టుకెళ్లిపోవచ్చు. ఈ స్టాళ్లను ఈమధ్యే హెబి ప్రావిన్స్లోని షిన్హువా జిల్లాలో ఏర్పాటు చేసిన్రు.
రోబోలు.. స్వచ్ఛ ఆస్పత్రులు
కొవిడ్ రోగులతో హాస్పిటళ్లు కిక్కిరిసిపోతున్నయి. మరి, ఆ హాస్పిటళ్లను మనుషులు క్లీన్ చేస్తే ఎక్కడో ఓ చోట ఆ వైరస్ పట్టుకునే చాన్స్ ఉంటుంది. అందుకే ఆ చాన్స్ వైరస్లకు ఇవ్వకుండా, రోబోలు ‘స్వచ్ఛ ఆస్పత్రుల మిషన్’ చేస్తున్నయి. షాండాంగ్ ప్రావిన్స్లోని ఖింగ్డావ్ హాస్పిటళ్లలో ఈ రోబో క్లీనర్లు ఇప్పటికే డ్యూటీ ఎక్కేసిన్రు.
డ్రోన్లు టోల్ తీస్కుంటున్నయ్
టోల్గేట్ దగ్గర బిల్లు కట్టాలంటే ముందు బండెనక బండి క్యూ కట్టాలె. ఒక్కటి అయిపోయినంకనే ఇంకోటి కదలాలె. కౌంటర్ దగ్గర టోల్ కలెక్టర్కు పైసలు కట్టాలె. కానీ, అక్కడ కొవిడ్ సోకితే..? అందుకే ఆ ఇబ్బందుల్లేకుండా డ్రోన్లే టోల్ తీస్కుంటున్నయి. బండ్లు క్యూ కట్టకుండా, క్యూఆర్ కోడ్తో స్కాన్ చేసి పైసలు తీస్కుంటున్నయి. గ్వాండాంగ్ ప్రావిన్స్లోని షెంజెన్లో కథ ఇది.
పైసలు క్లీన్ చేస్తున్నరు.. క్వారెంటైన్లో పెడుతున్నరు
పైసలతో మనిషి బంధం విడదీయలేనిది. అయి లేనిది బతుకుబండి ముందుకు సాగదాయె. కానీ, ఆ పైసలే బతుకుబండికి జబ్బులు తెప్పిస్తే పరిస్థితేంటి? కొవిడ్ భయాలు ఇప్పుడు చైనా కరెన్సీ నోట్లను చుట్టుముట్టేస్తోంది. అందుకే పైసలను అధికారులు క్లీన్ చేస్తున్నరు. వాటినీ 14 రోజుల పాటు క్వారెంటైన్లో పెడుతున్నరు. అవును మరి, నోట్లు ఒక చెయ్యి నుంచి మరొక చెయ్యి మారుతయ్‌ కదా. కొవిడ్ సోకినోళ్ల దగ్గరా నోట్లుంటయి కదా. అవి వేరే వాళ్ల దగ్గరకు పోతయి కదా. అప్పుడు ఆ నోట్లకూ వైరస్ అంటుకునే ప్రమాదముంటుంది కదా. అందుకే ఇదంతా. అంతేకాదు, వీలైనంత తొందరగా కొత్త నోట్లను మార్కెట్లోకి తెమ్మని అక్కడి సెంట్రల్ బ్యాంకు పెద్దాయన ఫాన్ యిఫి ఆర్డరేసిండు. ఇప్పటికే 400 కోట్ల యువాన్ల కొత్త నోట్లను హుబెయ్ ప్రావిన్స్లో రిలీజ్ చేసిన్రు కూడా.
ఆలూమగలు…వారానికోసారే కలవడం
ఆమె ఓ మెడికల్ ఆఫీసర్. ఆయనో పోలీస్ ఆఫీసర్. ఇద్దరూ భార్యాభర్తలు. కలిసి బతకాల్సిన వాళ్లిద్దరూ ఇప్పుడు వారానికోసారి మాత్రమే కలుసుకుంటున్నారు. మాటముచ్చట చెప్పుకుంటున్నారు. ఇదంతా కొవిడ్ ఎఫెక్ట్. యాంగ్ చెన్హువా ఝౌషన్లోని దింఘాయి ఆఫీస్లో పోలీస్ ఆఫీసర్గా పనిచేస్తున్నాడు. ఫాంగ్ మెంగ్షియా అక్కడే మెడికల్ స్టాఫ్ మెంబర్. వాళ్లిద్దరూ కొవిడ్పై పోరాటంలో భాగమయ్యారు. ఈ నేపథ్యంలోనే వాళ్లు కుటుంబంతో గడపలేకపోతున్నారు. వారానికి ఒకసారి మాత్రమే ఝౌషన్ చెక్పాయింట్ వద్ద కలుసుకుని కాసేపు మంచి చెడులు మాట్లాడుకుంటున్నారు. ఆ తర్వాత ఎవరి పనుల్లో వాళ్లు తలమునకలైపోతున్నారు.
