కుట్లు ఆరట్లే... పుండ్లు మానట్లే..!

• మంచిర్యాల ఎంసీహెచ్​లో బాలింతల గోస 
• బొంతలు కుట్టినట్లు కుట్లు వేస్తున్నారని ఆవేదన  
• డ్రెస్సింగ్ చేయకపోవడంతో మానని గాయాలు 
• డబుల్​ కుట్లతో అవస్థలు పడుతున్న బాలింతలు  
• కలెక్టరేట్​లో కంప్లైంట్​ చేసినా చర్యలు శూన్యం 

మంచిర్యాల,వెలుగు: ప్రభుత్వాసుపత్రుల్లో ప్రసవాల సంఖ్య పెంచాలని, సాధారణ కాన్పులు చేయాలని రాష్ర్ట వైద్య ఆరోగ్యశాఖ మంత్రి హరీశ్​​రావు చెప్తున్నా మంచిర్యాల ఎంసీహెచ్​లో పరిస్థితి మారడం లేదు. ఎంసీహెచ్​ను మెడికల్​ కాలేజీ పరిధిలోకి తీసుకొచ్చినప్పటికీ అరకొర వైద్యమే అందుతోందని ఆరోపణలు వస్తున్నాయి. ముఖ్యంగా డాక్టర్లు, సిబ్బంది గర్భిణులు, బాలింతల పట్ల నిర్లక్ష్యంగా వ్యవహరిస్తున్నారని, సరైన వైద్యం చేయడం లేదని పేషెంట్ల బంధువులు ఆరోపిస్తున్నారు. నార్మల్​ డెలివరీ అవుతుందని రోజుల తరబడి వెయిట్​ చేయిస్తున్నారని, సర్జరీలు చేసిన వాళ్లకు సరిగా కుట్లు వేయడం లేదని, డ్రెస్సింగ్​ చేయడం లేదని చెప్తున్నారు. డాక్టర్లు, సిబ్బంది తీరుతో హాస్పిటల్​లో తీవ్ర అవస్థలు పడుతున్నామని వాపోతున్నారు.  మంచిర్యాల గోదావరి రోడ్డులో రూ.17 కోట్లతో మాతా శిశు ఆరోగ్య కేంద్రం (ఎంసీహెచ్​)ను నిర్మించారు. మార్చిలో మంత్రులు హరీష్​రావు, ఇంద్రకరణ్​రెడ్డి అట్టహాసంగా ప్రారంభోత్సవం చేశారు. రెండు నెలల కిందట ఎంసీహెచ్​ను జిల్లా హాస్పిటల్​ నుంచి కొత్త బిల్డింగ్​లోకి షిఫ్ట్​ చేశారు. ఇక గర్భిణులు, బాలింతలు, పిల్లలకు మెరుగైన వైద్యం అందుతుందని అందరూ అనుకున్నారు. కానీ పరిస్థితి ఏమీ మారలేదు. డాక్టర్లు, సిబ్బంది నిర్లక్ష్యంగా వైద్యం అందిస్తున్నారు. సర్జరీలు చేసిన తర్వాత కుట్లు సరిగా వేయడం లేదు. నర్సింగ్​ స్టాఫ్​ కనీసం డ్రెస్సింగ్​ కూడా చేయడం లేదు. దీంతో చాలామందికి కుట్లు ఆరక గాయాలు మానడం లేదు. కొందరికి చీము వచ్చి కుట్లు పికిలిపోయి పండ్లు అవుతున్నాయి. ఇటీవల ఓ మహిళకు సర్జరీ చేసిన తర్వాత మూడు రోజులకే కుట్లు పికిలిపోయి పుండు కావడంతో ఆమెను కరీంనగర్​ ఎంసీహెచ్​కు తరలించారు. మరికొందరికి ఎనిమిది రోజుల తర్వాత మరోసారి కుట్లు వేస్తున్నారు. రెండుసార్లు కుట్లు వేయడంతో బాలింతలు నొప్పులతో అవస్థలు పడుతున్నారు. సర్జరీ తర్వాత వారం రోజులకు పేషెంట్లను డిశ్చార్జి చేయాలి. కానీ సరైన వైద్యం అందకపోవడంతో పదిహేను ఇరవై రోజుల దాకా హాస్పిటల్​లో ఉండాల్సి వస్తోంది.  

పిల్లలకు అందని మెరుగైన వైద్యం... 

ఎంసీహెచ్​లో పిల్లల వైద్యులు సరిపడా లేకపోవడంతో నవజాత శిశువులకు మెరుగైన వైద్యం అందడం లేదు. దీంతో అత్యవసర సమయాల్లో శిశువులను కరీంనగర్​ ఎంసీహెచ్​కు రెఫర్​ చేస్తున్నారు. బాలింతలను ఇక్కడ వదిలేసి పిల్లలను అంతదూరం తీసుకెళ్లలేక చాలా మంది జిల్లా కేంద్రంలోని ప్రైవేట్​ హాస్పిటళ్లను ఆశ్రయిస్తున్నారు.  

కనీస సౌలత్​లు కరువు...  

ఆధునిక సౌకర్యాలతో ఎంసీహెచ్​ను నిర్మించామని ప్రభుత్వం, ప్రజాప్రతినిధులు గొప్పలు చెప్పుకుంటున్నారు. కానీ ఇక్కడ పరిస్థితి మాత్రం అధ్వానంగా ఉంది. వార్డుల్లో తాగునీటి సౌకర్యం కూడా లేకపోవడంతో రూ.50 పెట్టి రోజుకో కూల్​ క్యాన్​ కొనుక్కుంటున్నారు. వార్డుల్లో సీలింగ్​ ఫ్యాన్లు చాలా ఎత్తున ఉండడంతో సరిగా గాలి రావడం లేదు. ఉక్కపోత భరించలేక పలువురు ఇండ్ల నుంచి టేబుల్​ ఫ్యాన్లు, కూలర్లు తెచ్చి పెట్టుకుంటున్నారు. ఓపీ కౌంటర్​ దగ్గర, వెయిటింగ్​ ఏరియాల్లో ఫ్యాన్లు లేకపోవడంతో ఇబ్బందులు పడుతున్నారు. ఎంసీహెచ్​లో పారిశుధ్య నిర్వహణ అధ్వానంగా ఉంది. 40 మందికి పైగా సిబ్బంది పనిచేయాల్సిన చోట కేవలం ఎనిమిది మందే ఉన్నారు. దీంతో హాస్పిటల్​లో ఎక్కడ చూసినా చెత్తా చెదారం పేరుకుపోయి కనిపిస్తోంది. వార్డుల్లో చెత్త వేయడానికి సరిపడా డస్ట్​బిన్లు కూడా ఏర్పాటు చేయలేదు. టాయ్​లెట్లలో సరిగా నీళ్లు రాకపోవడం, ఎప్పటికప్పుడు క్లీన్​ చేయకపోవడంతో కంపు కొడుతున్నాయి. 

పైసలు వసూల్...  

ఎంసీహెచ్​లో పనిచేసే కొంతమంది సిబ్బంది పేషెంట్ల దగ్గర డబ్బులు వసూలు చేస్తున్నారని ఆరోపిస్తున్నారు. సర్జరీకి రూ.500 నుంచి రూ.1000, నార్మల్​ డెలివరీకి రూ.500 వరకు వసూలు చేస్తున్నారని చెప్తున్నారు. హాస్పిటల్​లోని సమస్యలపై కొంతమంది బాలింతల కుటుంబీకులు ఈ నెల 22న కలెక్టరేట్​లో కంప్లైంట్​ చేశారు. ఈ విషయం కలెక్టర్​ దృష్టికి వెళ్లిందో లేదో... కానీ ఇప్పటివరకు ఎలాంటి చర్యలు తీసుకోలేదని వాపోతున్నారు.