మంచిర్యాల, వెలుగు: మంచిర్యాల గోదావరి ఒడ్డున ఉన్న మాతా శిశు ఆరోగ్యం కేంద్రానికి (ఎంసీహెచ్) మరోసారి ముంపు ముప్పు ముంచుకొచ్చింది. శుక్రవారం మధ్యాహ్నం ఎల్లంపల్లి ప్రాజెక్టు 17 గేట్లు ఓపెన్ చేసి 1.78 లక్షల క్యూసెక్కుల నీటిని విడుదల చేశారు. దీంతో గోదావరికి ఒక్కసారిగా వరద పోటెత్తెంది. ఇన్ఫ్లో అంతకంతకూ పెరుగుతుండడంతో ఏ క్షణంలోనైనా ఎంసీహెచ్ మునిగిపోయే ప్రమాదముందని ఇరిగేషన్ ఆఫీసర్లు హెచ్చరించారు. దీంతో వైద్యారోగ్యశాఖ అధికారులు శుక్రవారం ఎంసీహెచ్ను హడావిడిగా ఖాళీ చేశారు. బస్సులు, అంబులెన్సులలో సుమారు 120 మందికి పైగా బాలింతలు, గర్భిణులు, నవజాత శిశువులను హడావుడిగా మంచిర్యాలలోని గవర్నమెంట్ జనరల్ హాస్పిటల్కు షిఫ్ట్ చేశారు.
మరికొందరు ప్రైవేట్ హాస్పిటల్స్కు వెళ్లిపోయారు. పేషెంట్లకు అత్యవసరంగా ట్రీట్మెంట్అందించేందుకు అవసరమైన మెషీన్లు, మందులు, ఇతర పరికరాలను సైతం జీజీహెచ్కు తరలించారు. ఈ క్రమంలో అసలు ఏం జరుగుతుందో అర్థం కాక పేషెంట్లు, వారి బంధువులు హైరానా పడ్డారు. ఇప్పటికే జీజీహెచ్లో సరిపడా స్థలం లేకపోవడంతో ఇబ్బందులు పడుతున్నారు. ఒక్కసారిగా ఎంసీహెచ్ను ఖాళీ చేసి వంద మందికిపైగా పేషెంట్లను, పరికరాలను తరలించడంతో అవస్థలకు గురయ్యారు. మరోవైపు పేషెంట్లను తలించేందుకు అధికార బీఆర్ఎస్, ప్రతిపక్ష కాంగ్రెస్ పార్టీల లీడర్లు పోటీపడ్డారు. ఒకరిపై ఒకరు విమర్శలు చేసుకుంటూ గొడవకు దిగడం చర్చనీయాంశంగా మారింది.
నిరుడు నీటమునిగిన ఎంసీహెచ్
నిరుడు జూలైలో 12న గోదావరికి భారీగా వరద రావడంతో ఎంసీహెచ్ నీటమునిగింది. అంతకుముందు రోజు రాత్రికి రాత్రే పేషెంట్లను జీజీహెచ్కు తరలించడంతో పెద్ద ప్రమాదం తప్పింది. నాలుగు రోజుల పాటు ఎంసీహెచ్జలదిగ్బంధంలోనే చిక్కుకుంది. విలువైన వైద్య పరికరాలు, మందులు, కేసీఆర్ కిట్లు, ఫర్నిచర్ నీటమునిగి రూ.5 కోట్లకు పైగా నష్టం జరిగింది. వరదలకు కుప్పలు తెప్పలుగా కొట్టుకొచ్చిన పాములు ఎంసీహెచ్లో తిష్టవేశాయి. చాలారోజుల వరకు అటు పోవాలంటేనే జనాలు వణికిపోయారు. అనేక తర్జనభర్జనల తర్వాత ఎట్టకేలకు అధికారులు ఎంసీహెచ్కు రిపేర్లు చేపట్టారు. ఆరు నెలల కిందట రీ ఓపెన్ చేసి పేషెంట్లను తరలించారు. ఈసారి కూడా ముంపు ముప్పు పొంచి ఉండడంతో మరోసారి ఎంసీహెచ్ను ఖాళీ చేయక తప్పలేదు.
అనాలోచిత నిర్ణయాలతో ఆగమాగం
ప్రజాప్రతినిధులు, అధికారుల అనాలోచిత నిర్ణయాల వల్లే ఎంసీహెచ్కు ఈ దుర్గతి పట్టింది. గోదావరి ఒడ్డున ముంపు ప్రాంతమని తెలిసి కూడా రూ.18 కోట్లతో ఎంసీహెచ్ను నిర్మించడంపై మొదటి నుంచి విమర్శలు వస్తున్నాయి. అయినప్పటికీ ఎమ్మెల్యే దివాకర్రావు గాని, అప్పటి కలెక్టర్ భారతి హోళికేరి గాని పట్టించుకోలేదు. ఎట్టకేలకు ఎంసీహెచ్ నిర్మాణం పూర్తి చేసి నిరుడు మార్చి 4న మంత్రి హరీశ్రావుతో ప్రారంభింపజేశారు. ఏప్రిల్ లో గర్భిణులు, బాలింతలకు వైద్యసేవలు ప్రారంభించారు.
మూడు నెలలు కూడా తిరగకుండానే జులైలో గోదావరికి భారీ వరదలు వచ్చి గ్రౌండ్ ఫ్లోర్ వరకు మునిగిపోయింది. ఏటా వానకాలంలోనే ఇదే పరిస్థితి ఉంటుందని, పేషెంట్ల సౌకర్యార్థం ఎంసీహెచ్ను ఐబీలో ఏర్పాటు చేయాలని ప్రతిపక్ష కాంగ్రెస్, బీజేపీ లీడర్లు డిమాండ్ చేస్తున్నారు. జీజీహెచ్ఎదురుగా ఉన్న ఐబీలో ఇంటిగ్రేటెడ్ వెజ్, నాన్వెజ్ మార్కెట్ నిర్మిస్తూ ఎంసీహెచ్ను గోదావరి ఒడ్డున ఏర్పాటు చేయడం కన్నా మూర్ఖత్వం మరోటి ఉందడని విమర్శిస్తున్నారు. ఇప్పటికైనా ఎంసీహెచ్ను సురక్షిత ప్రాంతానికి తరలించాలని సూచిస్తున్నారు.
