న్యూఢిల్లీ: మెడికల్ ఫీల్డ్లోకి పెద్ద ఎత్తున ప్రైవేట్ ఇనిస్టిట్యూట్లు రావాలని ప్రధానమంత్రి నరేంద్ర మోడీ పిలుపునిచ్చారు. శనివారం ఆరోగ్య శాఖ పోస్ట్ బడ్జెట్ వెబినార్ను ప్రధాని ప్రారంభించి మాట్లాడారు. ‘‘మన పిల్లలు చదువుకోవడానికి చిన్న చిన్న దేశాలకు వెళ్తున్నారు. ముఖ్యంగా మెడిసిన్ స్టడీకోసం చాలామంది విదేశాలకు వెళ్తున్నారు. భాషాపరంగా ఇబ్బందులు ఉన్నప్పటికీ, అక్కడికెళ్లి చదువుకుంటున్నారు. ఫలితంగా వేల కోట్ల రూపాయలు విదేశాలకు వెళ్తున్నాయి” అని ఆవేదన వ్యక్తంచేశారు. మన స్టూడెంట్లకు మన దేశంలోనే మెడిసిన్ చదివేందుకు అవకాశం రావాలని, ప్రైవేటు ఇనిస్టిట్యూట్లు ముందుకు రావాలని పిలుపునిచ్చారు. ఇనిస్టిట్యూట్ల ఏర్పాటుకు భూములు కేటాయించేందుకు రాష్ట్ర ప్రభుత్వాలు మంచి పాలసీలు రూపొందించాలని సూచించారు. అప్పుడు మనమే ప్రపంచ డిమాండ్కు సరిపడా పెద్ద సంఖ్యలో డాక్టర్లను, పారామెడికల్ స్టాఫ్ను తయారు చేయగలమన్నారు. రష్యా యుద్ధంతో ఉక్రెయిన్లో మన స్టూడెంట్లు చిక్కుకుపోవడం, వారిలో చాలామంది మెడిసిన్ స్టూడెంట్లు ఉండడంతో మోడీ ఈ కామెంట్లు చేశారు.
పల్లెల్లో హెల్త్ సెంటర్లు..
హెల్త్ కేర్ రంగంలో సమగ్ర విధానాన్ని అనుసరిస్తున్నామని మోడీ చెప్పారు. మారుమూల ప్రాంతాల్లోని ప్రజలకూ మంచి ట్రీట్మెంట్ అందేలా, ‘‘వన్ ఇండియా వన్ హెల్త్” స్ఫూర్తితో ముందుకెళ్తున్నామని తెలిపారు. పల్లెలు మొదలు జిల్లా స్థాయి వరకు హెల్త్ సెంటర్లు ఏర్పాటు చేస్తామని వెల్లడించారు. వీటి నిర్వహణలో ప్రైవేట్ ఇనిస్టిట్యూట్లు కీలక పాత్ర పోషిస్తాయన్నారు. దేశవ్యాప్తంగా 1.5 లక్షల హెల్త్ సెంటర్లు నిర్మిస్తున్నామని, ఇప్పటికే 85 వేల సెంటర్లలో సేవలు మొదలయ్యాయని చెప్పారు. హెల్త్ కేర్ సేవలకు డిమాండ్ పెరగడంతో హెల్త్ సెక్టార్ కు ఈసారి బడ్జెట్ పెంచామన్నారు.
దేశంలో అందరికీ డిజిటల్హెల్త్అకౌంట్
ఆయుష్మాన్ భారత్ డిజిటల్ మిషన్(ఏబీడీఎం) ప్రోగ్రామ్ను దేశవ్యాప్తంగా అమలుచేయాలని కేంద్ర కేబినెట్ నిర్ణయించింది. శనివారం ప్రధాని మోడీ అధ్యక్షతన సమావేశమైన కేబినెట్పలు కీలక నిర్ణయాలు తీసుకుంది. ఏబీడీఎం అమలు కోసం రూ.1600 కోట్ల నిధులు కేటాయించింది. ఇందుకు నేషనల్ హెల్త్ అథారిటీ(ఎన్ హెచ్ఏ) ఏజెన్సీగా వ్యవహరించనుంది.
