- కాషాయమయమైన మహబూబ్నగర్ సిటీ
మహబూబ్నగర్, వెలుగు: ‘చాలా రోజుల తర్వాత నాకు మీ దర్శనం చేసుకునే అవకాశం దొరికింది. మీరు చూపిస్తున్న ప్రేమకు, అభిమానానికి ముగ్దుడినయ్యాను. పాలమూరు ప్రజలుగా మిమ్మల్ని దర్శనం చేసుకోవడంతో నా జన్మ ధన్యమైంది’ అని ప్రధాన మంత్రి నరేంద్ర మోడీ పేర్కొన్నారు. మహబూబ్నగర్ జిల్లా భూత్పూర్ మున్సిపాల్టీలోని అమిస్తాపూర్లోని ఐటీఐ కాలేజ్గ్రౌండ్లో ఆదివారం నిర్వహించిన ‘పాలమూరు ప్రజా గర్జన’ సభకు ప్రధాని చీఫ్ గెస్ట్గా హాజరై మాట్లాడారు. ఆయన మాట్లాడుతుండగా ప్రజలంతా ఒక్కసారిగా ‘జై మోడీ.. జై మోడీ’ అంటూ పెద్ద ఎత్తున నినాదాలు చేశారు. దీంతో ప్రధాని నవ్వుతూ ఒక్క క్షణం తన ప్రసంగాన్ని ఆపేశారు. ‘మీ ఉత్సాహం చూస్తే బీఆర్ఎస్, కాంగ్రెస్ పార్టీలకు ఈ రోజు రాత్రి నిద్ర పట్టదు’ అని అనడంతో అందరూ ఈలలు, కేకలు వేశారు.
స్పెషల్ అట్రాక్షన్గా ఓపెన్ టాప్ జీప్..
ప్రధాని రాక సందర్భంగా 30 ఎకరాల విస్తీర్ణంలో మూడు భారీ సభా ప్రాంగణాలను ఏర్పాటు చేశారు. అందులో ఒక ప్రాంగణంలో ఏర్పాటు చేసిన వేదిక నుంచి ప్రధాని రూ.13,500 కోట్ల అభివృద్ధి పనులకు వర్చువల్గా ప్రారంభించారు. అనంతరం అక్కడి నుంచి ఓపెన్ టాప్ జీపులో ప్రధాని ఎక్కారు. దాదాపు 22 నిమిషాల పాటు రెండు సభా ప్రాంగణాల్లో తిరిగారు. మహిళలు, పార్టీ లీడర్లు ప్రధానిపై పూల వర్షం కురిపించారు. ఈ సందర్భంగా ఆయన ప్రతి ఒక్కరికీ అభివాదం చేస్తూ సభా వేదిక వద్దకు చేరుకున్నారు.
లక్షకు పైగా తరలివచ్చిన జనం..
ప్రధాని రాక సందర్భంగా మహబూబ్నగర్, నారాయణపేట, గద్వాల, వనపర్తి, నాగర్కర్నూల్ జిల్లాల నుంచి లక్షకు పైగా జనం తరలివచ్చారు. మధ్యాహ్నం 3 గంటల తర్వాత ఒక్కొక్కరిగా రావడంతో 4 గంటల వరకు రెండు సభా ప్రాంగణాలు పూర్తిగా నిండిపోయాయి. ప్రధాని ప్రసంగిస్తున్న సమయంలో దాదాపు 20 వేల మంది బయటే ఉండిపోయారు. సభా వేదిక నుంచి 4 కిలోమీటర్ల మేర ఎక్కడ చూసినా ప్రజలు గుంపులు గుంపులుగా కనిపించారు. పార్కింగ్ స్థలాలు వాహనాలతో కిక్కిరిసిపోయాయి. సభకు వచ్చే ప్రజలకు ఎక్కడికక్కడ వాటర్ బాటిళ్లను అందుబాటులో ఉంచారు. వలంటీర్లు, బీజేపీ యువ మోర్చా, ఇతర లీడర్లు సహాయ సహకారాలు అందించారు.
పోలీసుల సేవలు భేష్..
ప్రధాని సభ సందర్భంగా మూడు రోజులుగా పోలీసులు శ్రమిస్తున్నారు. ముందస్తు చర్యలు తీసుకోవడంతో ఎలాంటి ఇబ్బందులు ఏర్పడలేదు. నారాయణపేట, మహబూబ్నగర్, హైదరాబాద్, గద్వాల, నాగర్కర్నూల్ ప్రాంతాల నుంచి సభకు వచ్చే వెహికిల్స్కు వేర్వేరుగా పార్కింగ్ స్థలాలు అలాట్ చేశారు. దీంత ఎన్హెచ్–-44పై ట్రాఫిక్ ఇబ్బందులు తలెత్తలేదు. కార్యక్రమంలో బీజేపీ జాతీయ ఉపాధ్యక్షురాలు డీకే అరుణ, ఓబీసీ మోర్చా జాతీయ అధ్యక్షుడు, ఎంపీ లక్ష్మణ్, జాతీయ ప్రధాన కార్యదర్శి, కరీంనగర్ ఎంపీ బండి సంజయ్, జాతీయ కార్యవర్గ సభ్యుడు ఏపీ జితేందర్రెడ్డి, నిజామాబాద్ ఎంపీ ధర్మపురి అరవింద్, దుబ్బాక ఎమ్మెల్యే రఘునందర్రావు, రాష్ట్ర ప్రధాన కార్యదర్శి ప్రదీప్కుమార్, వెంకటేశ్, రాష్ట్ర కోశాధికారి శాంతికుమార్, రాష్ట్ర కార్యవర్గ సభ్యులు పద్మజారెడ్డి, పడాకుల బాలరాజు, ఎగ్గని నర్సింహులు, సుదర్శన్రెడ్డి, మహబూబ్నగర్ పార్లమెంట్ ఇన్చార్జి డోకూరు పవన్కుమార్రెడ్డి, పార్టీ జిల్లా అధ్యక్షుడు వీరబ్రహ్మచారి పాల్గొన్నారు.
క్యాడర్లో జోష్..
ప్రధాని సభ ఊహించిన దానికంటే గ్రాండ్ సక్సెస్ అయ్యింది. జన సమీకరణ చేయడంలో ఆ పార్టీ లీడర్లు విజయవంతం అయ్యారు. అన్ని జిల్లా కేంద్రాల నుంచి ఆర్టీసీ బస్సులు, ప్రైవేట్ బస్సులతో పాటు టెంపో ట్రావెల్స్ను ప్రజలను తరలించేందుకు అందుబాటులో ఉంచారు. సభ సక్సెస్ కావడంతో క్యాడర్లో కొత్త ఉత్సాహం కనిపించింది. ఇదే ఉత్సాహంతో రానున్న అసెంబ్లీ ఎన్నికల్లో సత్తా చూపించేందుకు ఆ పార్టీ లీడర్లు సిద్ధం అవుతున్నారు.
