ముంబై: స్టాక్ మార్కెట్లు బుధవారం (సెప్టెంబర్ 03) లాభాలతో ముగిశాయి. మెటల్ షేర్లలో రాలీ, జీఎస్టీ కౌన్సిల్ సమావేశంపై ఆశావాదం మార్కెట్లకు ఊతమిచ్చాయి. మొదట్లో నష్టాల్లో ఉన్నప్పటికీ, తర్వాత సెన్సెక్స్ 409.83 పాయింట్లు పెరిగి 80,567.71 వద్ద ముగిసింది. ఎన్ఎస్ఈ నిఫ్టీ 135.45 పాయింట్లు లాభపడి 24,715.05 వద్ద స్థిరపడింది.
సెన్సెక్స్లో టాటా స్టీల్ షేరు 5.90 శాతం లాభపడి టాప్గెయినర్గా నిలిచింది. టైటాన్, మహీంద్రా అండ్ మహీంద్రా, ఐటీసీ, ఎటర్నల్, స్టేట్ బ్యాంక్ ఆఫ్ ఇండియా, ట్రెంట్ లాభపడ్డాయి. ఇన్ఫోసిస్, ఎన్టీపీసీ, హిందుస్థాన్ యూనిలివర్, టీసీఎస్, అదానీ పోర్ట్స్, భారతీ ఎయిర్టెల్ షేర్లు నష్టపోయాయి. జీఎస్టీ కౌన్సిల్ రెండు రోజుల సమావేశంలో జీఎస్టీ రేట్లను 5 శాతం, 18 శాతానికి తగ్గించే అంశంపై చర్చించనుంది. ఈ విషయం మార్కెట్లలో సానుకూల సెంటిమెంట్‌‌‌‌కు దారితీసింది.
బీఎస్ఈ స్మాల్క్యాప్ సూచీ 0.90 శాతం, మిడ్క్యాప్ సూచీ 0.63 శాతం లాభపడ్డాయి. ఆసియా మార్కెట్లలో దక్షిణ కొరియా కోస్పి లాభాలతో ముగియగా, జపాన్ నిక్కీ 225 సూచీ, షాంఘై ఎస్ఎస్ఈ కాంపోజిట్ సూచీ, హాంకాంగ్ హాంగ్ సెంగ్ నష్టాలతో ముగిశాయి. యూరప్ ఈక్విటీ మార్కెట్లు లాభాలతో ట్రేడయ్యాయి.
మంగళవారం యూఎస్ మార్కెట్లు నష్టాలతో ముగిశాయి. ఎక్స్ఛేంజ్ డేటా ప్రకారం, విదేశీ సంస్థాగత పెట్టుబడిదారులు (ఎఫ్ఐఐలు) మంగళవారం రూ. 1,159.48 కోట్ల విలువైన ఈక్విటీలను విక్రయించారు. అంతర్జాతీయ చమురు బెంచ్మార్క్ బ్రెంట్ క్రూడ్ ధర 1.52 శాతం తగ్గి బ్యారెల్ధర 68.09 డాలర్ల వద్ద ఉంది.
