న్యూ ఇయర్ పార్టీల్లో మగవాళ్లు మందుకే ఓటేస్తారు. యూత్ అయితే ఆ మందు కోసం పోటీలు పడతారు. రోజూ తాగే అలవాటున్నా ఈ రోజు తాగడంలో ఉండే కిక్కే వేరు. అంతేకాదు.. ఈ రోజు అనుభవమూ వేరని చెప్తారు. నైట్ పార్టీలో డ్యాన్స్ వేస్తూ ఒక్కో పెగ్గును ఎత్తుతూ ఉండే వాళ్లు మంచినీళ్లు తాగరు. మందులో కలిపే సోడా, ఐసే ఈ రాత్రంతా శరీరావసరాలు తీరుస్తయ్. ఆ మత్తులో గంటల కొద్దీ పడుకున్నప్పుడు శరీరానికి నీరు అందదు.. కానీ జీవ క్రియల వల్ల శరీరంలో ఉన్న నీరంతా పోతుంది.
అప్పుడు మొదలవుతుంది సమస్య. కళ్లు తిరగడం, కడుపులో తిప్పడం, తలనొప్పితో ఏదో తెలియని సమస్య బాధపెడుతుంది.. అదేమిటో అర్థం కాక తలబాదుకోకుండా అది 'ఆల్కహాల్ హ్యాంగోవర్' అని గుర్తించాలి. తాగడం అలవాటే అనుకోకండి. ఆ తాగడం వల్ల ఈ రోజు శరీరానికి వచ్చిన సమస్యనుకుని కొంచెం విశ్రాంతి, మరికొన్ని జాగ్రత్తలు తీసుకుంటే ఫస్ట్ డేనే కాదు ఏడాదంతా సంతోషంగా సాగిపోతుంది.
హ్యాంగోవర్ లక్షణాలు
- ఆయాసం
- నోరు ఎండిపోతుంది
- విపరీతమైన దాహం
- కాళ్లూ, చేతుల వణుకు
- కండరాల నొప్పి
- సరిగా శ్వాస తీసుకోలేక పోవడం
- కళ్లు తిరగడం
- ఎక్కువ వెలుతురు చూడలేరు. ఎక్కువ శబ్దం వినలేరు.
- కొన్ని నిమిషాల నుంచి గంటలపాటు స్పృహ కోల్పోతారు.
- తలనొప్పి
- అతి నిద్ర
- కడుపులో వికారం, తిప్పడం, వాంతులు
- ఆకలి ఉండదు.
- విపరీతమైన మూత్ర విసర్జన
- గుండె వేగంగా కొట్టు కోవడం
- విపరీతంగా చెమట పోయడం.
- పిచ్చిగా ప్రవర్తించడం
- గందర గోళంగా ఉండడం
బెడ్ రెస్ట్.. బెటర్
నిద్ర నుంచి బలవంతంగా ఎవరైనా లేపినా. ఏదో ఒక పని చేయాలని ఎలాగైనా లేచేందుకు ప్రయత్నించినా శరీరం, మనసు సహకరించవు. కాబట్టి నిద్ర పట్టినా.. పట్టకున్నా మంచంపైనే ఉంటే మంచిది. ఏ పని ఉన్న వాయిదా వేయడమే ఉత్తమం. డ్రైవింగ్ సరిగా చేయలేదు. డీ హైడ్రేషన్ వల్ల ఎలక్ట్రోలైట్స్ తగ్గిపోయి మెదడు సరైన నిర్ణయాలు తీసుకోలేదు. ఒక్కోసారి. కళ్లుతిరుగుతాయి. అందుకే, అన్ని పనులకూ దూరంగా ఉండటమే బెటర్. అవసరమనుకుంటే కుటుంబ సభ్యుల సహకారంతో పనులు చక్కదిద్దుకోవాలి.
అల్లంతో మొదలుపెట్టండి
అతిగా తాగితే కడుపులో తిప్పడం సాధారణమే. వాంతులు కూడా అవుతాయి. అలాంటప్పుడు. ఏది తిన్నా మళ్లీ వాంతులవుతాయి. సమస్య నుంచి బయటపడాలంటే కడుపులో ఏదో ఒకటి పడాలి. ఈ సమస్యకు మందు అల్లమే. కడుపులో తిప్పుతున్నట్లుంటే అల్లంతో ఆ సమస్యను అధిగమించవచ్చు. ఉదయం అల్లం కషాయం తాగినా, అల్లంతో చేసిన టీ తాగినా కడుపులో తిప్పడం తగ్గిపోతుంది. ఆ తర్వాత ఏదయినా లైట్ ఫుడ్ తింటే వాంతులు కావు.
రీ 'హైడ్రేషన్'
డీహైడ్రేషన్ నుంచి బయటపడేందుకు శరీరాన్ని మళ్లీ లవణాలతో నింపాలి. ఒక టీ స్పూన్ సాల్ట్, ఎనిమిది టీ స్పూనుల పంచదారని అయిదు కప్పుల డిస్టిల్డ్ వాటర్ (వేడి చేసి చల్లార్చిన నీళ్లు) లో కలిపి శరీరానికి సోడియం క్లోరైడ్, గ్లూకోజ్ని అందించే ద్రావణం తయారు చేసుకోవాలి. ఈ నీళ్లని కొద్ది కొద్దిగా రోజంతా తాగాలి. 24 గంటలపాటు ఇలా చేస్తే డీ హైడ్రేషన్ వల్ల కలిగే కళ్లు తిరగడం, లైట్ సౌండ్ సెన్సిటివిటీల నుంచి బయటపడతారు.
లైటే రైట్
హ్యాంగోవర్ సమస్య ఉన్నప్పుడు హెవీ ఫుడ్ తీసుకుంటే మరో సమస్యని కొని, తెచ్చుకున్నట్టే. లిక్విడ్ ఫుడ్ తో ప్రారంభించాలి. లైట్ ఫుడ్ ని కొంచెం కొంచెం తీసుకోవాలి. ఓఆర్ఎస్. ద్రావణం, కొబ్బరి నీళ్లు, జ్యూస్ తీసుకుంటే శరీరానికి త్వరగా శక్తి అందుతుంది. శరీరంలో ద్రవాల పరిమాణం పెరుగుతుంది. డిసెంబరు 31 రాత్రి ఎక్కువగా ఆల్కహాల్ తీసుకుని, హ్యాంగోవర్తో ఉన్నప్పుడు జనవరి ఫస్టున ఇచ్చే పార్టీలకు తప్పకుండా దూరంగా ఉండాలి. కేకులు, బేకరీ ఐటమ్స్, సాఫ్ట్ డ్రింక్స్ ని పూర్తిగా పక్కన పెట్టాలి. నాన్వెజ్, హెవీ ఫుడ్ తీసుకోవద్దు..
ఆల్కహాల్ హ్యాంగోవర్ తో మన దేశంలో ఏటా కోటి మంది దవాఖానల పాలవుతున్నారు.హ్యాంగోవర్ లక్షణాలు తీవ్రంగా ఉంటే సమస్య కూడా తీవ్రంగా ఉన్నట్లు. దీనిని నిర్లక్ష్యం చేస్తే ప్రాణహాని కూడా ఉండొచ్చు.హ్యాంగోవర్ సమస్య వున్న వాళ్లని దవాఖానలో చేర్చి అత్యవసర వైద్యం అందించాలి.
