- తల్లిదండ్రులను కోల్పోయిన బాలుడికి అన్యాయం చేస్తున్నారని ఆరోపణ
జగిత్యాల టౌన్, వెలుగు: తల్లిని కోల్పోయి అనాథగా మారిన చిన్నారికి ఆస్తి పంపకాల్లో అన్యాయం చేస్తున్నారని ఆరోపిస్తూ.. చిన్నారి తరఫు బంధువులు మహిళ డెడ్బాడీని ఇంటి ఆవరణలో పూడ్చేందుకు యత్నించారు. ఈ ఘటనలో జగిత్యాల పట్టణంలోని వంజరివాడలో ఉద్రిక్తత నెలకొంది.
స్థానికులు తెలిపిన వివరాల ప్రకారం.. వంజరివాడకు చెందిన మాధురి(35) కొంతకాలంగా అనారోగ్యంతో బాధపడుతూ ఆదివారం మృతిచెందింది. ఆమె భర్త మూడేళ్ల క్రితమే మృతిచెందాడు. వీరికి ఒక కొడుకు రాజ్(13) ఉన్నాడు.
భర్త చనిపోగానే మాధురి అత్త తమ ఆస్తిని బిడ్డలకు మాత్రమే ఇస్తానని చెప్పింది. ఈ విషయంలో తన కొడుకు పరిస్థితి ఏం కావాలని మాధురి మనస్తాపంతో ఉంటోంది. ఈ క్రమంలో ఆమె చనిపోవడంతో.. వారి తరఫు బంధువులు ఇంటికి చేరుకుని అత్త తీరుతోనే మాధురి చనిపోయిందని ఆరోపించారు.
వారసత్వంగా ఆస్తి ఇవ్వాల్సి వస్తుందని ఒత్తిడికి గురిచేశారని వాపోయారు. తల్లిదండ్రులను కోల్పోయిన బాలుడు రాజ్కు అన్యాయం చేస్తున్నారంటూ ఆగ్రహం వ్యక్తం చేశారు. మాధురి డెడ్బాడీని ఇంటి ఆవరణలోనే పూడ్చిపెట్టేందుకు బొంద తవ్వడంతో పరిస్థితి ఉద్రిక్తంగా మారింది. సమాచారం అందుకున్న పోలీసులు వెంటనే ఘటనా స్థలానికి చేరుకుని ఆందోళనకారులను శాంతింపజేశారు. ఆస్తి వివాదాన్ని న్యాయపరంగా పరిష్కరించుకోవాలని సూచించి పరిస్థితిని అదుపులోకి తీసుకొచ్చారు.
