న్యూఢిల్లీ: ఆర్థిక నేరాలకు పాల్పడినట్లు ఆరోపణలు ఎదుర్కొంటున్న కంపెనీలపై, వ్యక్తులపై త్వరగా చర్యలు తీసుకునేందుకు ప్రత్యేక కోడ్ విధానాన్ని తేవాలని కేంద్ర ప్రభుత్వం భావిస్తోంది. ఇందుకోసం నిందితులకు పాన్ లేదా ఆధార్తో "ప్రత్యేక కోడ్" కేటాయించే కొత్త విధానాన్ని తేవాలన్న ప్రపోజల్ను పరిశీలిస్తోంది. ఈ విధానంలో ఆల్ఫా-న్యూమరిక్ కోడ్ ను కంప్యూటర్ ద్వారా -జెనరేట్ చేసి పోలీసు యూనిట్ లేదా కేంద్ర దర్యాప్తు సంస్థకు పంపిస్తారు. నిందితులకు సంబంధించిన డేటాను నేషనల్ ఎకనామిక్ అఫెన్స్ రికార్డ్స్ (ఎన్ఈఓఆర్)లో ఫీడ్ చేసిన తర్వాతే నంబర్లు జారీ అవుతాయి.
ఇందుకు సంబంధించిన సెంట్రల్ రిపాజిటరీ ఇంకా పూర్తిగా పని చేయడం లేదు. ఈ విధానం వల్ల ఏజెన్సీలు ఆర్థిక నేరాలను వేగంగా దర్యాప్తు చేయడానికి, చార్జిషీట్ దాఖలు చేయడానికి వీలవుతుంది. ఆరోపణలు ఎదుర్కొంటున్న సంస్థలు లేదా వ్యక్తులపై బహుళ-ఏజెన్సీల దర్యాప్తును వేగంగా ప్రారంభించవచ్చు. ఈ కోడ్ను 'యూనిక్ ఎకనామిక్ అఫెండర్ కోడ్'గా పిలుస్తారు. నిందితుడు ఒక వ్యక్తి అయితే ఆధార్తో, కంపెనీ అయితే పాన్కార్డుకు లింక్ అవుతుందని సమాచారం. ఈ విధానం అమల్లోకి వస్తే .. ఇది వరకే వివిధ ఆర్థిక నేరాల్లో చిక్కుకున్న వాళ్లకు ప్రత్యేక కోడ్ ఇస్తారు. ఢిల్లీ మాజీ డిప్యూటీ సీఎం మనీశ్ సిసోడియా, లిక్కర్బారన్ విజయ్ మాల్యా, కేంద్ర మాజీ ఆర్థికమంత్రి చిదంబరం వంటి వాళ్లకు ఈ విధానం వర్తిస్తుందని ఎక్స్పర్టులు చెబుతున్నారు. ఎన్ఈఓఆర్ ఇలాంటి వాళ్ల డేటాను స్టోర్ చేస్తుంది. రాబోయే నాలుగైదు నెలల్లో ఇది పూర్తిస్థాయిలో పనిచేయడం మొదలవుతుందని సంబంధిత వర్గాలు తెలిపాయి. త్వరలో జరిగే ఫైనాన్షియల్ యాక్షన్ టాస్క్ఫోర్స్ (ఎఫ్ఏటీఎఫ్) సమావేశంలో దీనిని ప్రదర్శిస్తారని సమాచారం.
