భద్రాద్రికొత్తగూడెం/ఖమ్మం టౌన్/పాల్వంచ, వెలుగు : పార్లమెంట్లో ఎంపీలను మూకుమ్మడిగా సస్పెండ్ చేయడం రాజ్యాంగ విరుద్ధమని కాంగ్రెస్, సీపీఐ, సీపీఎం, న్యూడెమోక్రసీ, ప్రజాపంథా పార్టీలకు చెందిన లీడర్లు శుక్రవారం ఉమ్మడి జిల్లా వ్యాప్తంగా ఆందోళనలు చేపట్టారు. ఖమ్మంలో కాంగ్రెస్ జిల్లా అధ్యక్షుడు పువ్వాళ్ల దుర్గా ప్రసాద్, పాల్వంచలో డీసీఎంఎస్ వైస్ చైర్మన్ కొత్వాల శ్రీనివాసరావు
కొత్తగూడెంలో ఆయా పార్టీలకు చెందిన జిల్లా నేతలు ఎస్కె. సాబీర్ పాషా, అన్నవరపు కనకయ్య, కెచ్చల రంగయ్య, అంతోటి పాల్, కె. సురేందర్ మాట్లాడారు. పార్లమెంట్పై అగంతకులు చేసిన దాడిపై సభలో చర్చించాలని అడిగిన ఇండియా కూటమి పార్లమెంటు సభ్యులను అప్రజాస్వామికంగా సస్పెన్షన్ చేయడాన్ని తీవ్రంగా ఖండిస్తున్నట్టు తెలిపారు.
పార్లమెంట్చరిత్రలోనే గతంలో ఎన్నడూ లేని విధంగా కేంద్రంలోని బీజేపీ గవర్నమెంట్ 146 మందికి పైగా ప్రతిపక్ష పార్టీల ఎంపీలను సస్పెండ్ చేయడం దారుణమన్నారు. ఇండియా కూటమి ఐక్యతను జీర్ణించుకోలేని బీజేపీ సర్కార్ అప్రజాస్వామికంగా వ్యవహరిస్తోందని మండిపడ్డారు. అన్ని రంగాల్లో వైఫల్యం చెందిన బీజేపీకి ప్రజలు గుణపాఠం చెప్పాలని పిలుపునిచ్చారు.
