కిచెన్ తెలంగాణ:   సొరకాయ ఐస్ క్రీం..పాన్ కేక్ తయారీ ఇలా.. సూపర్ టేస్ట్.. పిల్లలు చాలా ఇష్టంగా తింటారు.

ఆనపకాయతో మహా అంటే కూర చేసుకోవచ్చు. లేదా పులుసు వండేయొచ్చు. మీరెప్పుడైనా ఆనపకాయతో ఐస్క్రీం చేసుకుని చల్లచల్లగా తిన్నారా? ఉల్లిగడ్డతో కలిపి సూప్ తయారుచేసుకున్నారా? ఈ సూప్ లు, ఐస్ క్రీంలు వద్దనుకుంటే కారంకారంగా పాన్కోక్ చేసుకోవచ్చు.. ఇప్పుడు వీటిని ఎలా తయారు చేయాలో తెలుసుకుందాం. .. 

ఆనపకాయతో ఐస్క్రీమ్ తయారీకి కావాల్సినవి

• ఆనపకాయ తరుగు - 500 గ్రాములు
•  చక్కెర - ఒక కప్పు 
• క్రీమ్- మూడు కప్పులు 
• తేనె - రెండు టేబుల్ స్పూన్స్ 
• యాలకుల పొడి- ఒక టేబుల్ స్పూన్

ఆనపకాయతో ఐస్​క్రీం తయారీ విధానం

ఆనపకాయ తరుగు, చక్కెర, యాలకుల పొడిని నాన్ స్టిక్ పాన్ లో వేయాలి. ఆనపకాయ తరుగును మెత్తగా, నీళ్లు ఆవిరి అయ్యేంత వరకు ఉడికించాలి. 

ఆ మిశ్రమం చల్లారేవరకు పక్కన పెట్టాలి. అందులో మూడు కప్పుల క్రీమ్, రెండు టేబుల్ స్పూన్లు తేనెను వేసి గాలి చొరబడని కంటైనర్లో ఉంచి ఫ్రీజర్లో ఒక గంటసేపు ఉంచాలి. 

ఆ తరువాత వేరొక గిన్నెలోకి తీసుకుని విస్కర్ రెండు నిమిషాలు కలపాలి. మిశ్రమాన్ని బాగా గడ్డకట్టేంత వరకు మళ్లీ ఫ్రీజర్ లో పెట్టుకుంటే చల్లచల్లని ఆనపకాయ ఐస్ క్రీమ్ రెడీ.. ఎండాకాలంలో కూల్​ కూల్​గా ఆరోగ్యమైన ఐస్​ క్రీం రెడీ..!

ఆనపకాయ -ఉల్లిగడ్డ సూప్ తయారీకి కావాల్సినవి

 

• ఆనప (సొర) కాయ తరుగు - రెండు కప్పులు
• ఉల్లిగడ్డ తరుగు - ఒక కప్పు
• ఆలుగడ్డ తరుగు - ఒక కప్పు
• వైట్ సాస్ - ఒక కప్పు
• ఉప్పు తగినంత
• మిరియాల పొడి-కొద్దిగా
• నీళ్లు- రెండు కప్పులు

ఆనపకాయ -ఉల్లిగడ్డ సూప్ తయారీ విధానం

ప్రెషర్ కుక్కర్​ లో  అనపకాయ, ఉల్లిగడ్డ, ఆలుగడ్డ తరుగు వేసి రెండు కప్పుల నీళ్లు పోసి మూత పెట్టాలి.
మూడు విజిల్స్ వచ్చేవరకు ఉడికించాలి. 

ఆ మిశ్రమం చల్లారాక గరిటెతో మెత్తగా మెదపాలి. తరువాత ఒక పాన్​ లోకి మిశ్రమాన్ని తీసుకోవాలి. 

అందులో ఒక కప్పు వైట్ సాస్, సరిపడా ఉప్పు, కొద్దిగా మిరియాల పొడి వేసి సన్నటి మంట మీద రెండు నిమిషాలు ఉడికిస్తే. అనపకాయ ఉల్లిగడ్డ సూప్ రెడీ..

సొరకాయతో పాన్ కేక్ తయారీకి కావాల్సినవి

 

• ఆనపకాయ (చిన్నది) -ఒకటి 
• అల్లం- ఒక టేబుల్ స్పూన్
•  నీళ్లు - సరిపడా
• పచ్చి మిర్చి- పది
• ఉల్లిగడ్డలు- రెండు
• బియ్యప్పిండి - ఒక కప్పు
• ఉప్పు- తగినంత
• నూనె –-100 గ్రాములు
• జీలకర్ర-ఒక టేబుల్ స్పూన్

సొరకాయతో పాన్ కేక్ తయారీ విధానం

ఆనపకాయ తొక్కతీసి ముక్కలుగా తరగాలి ఆ ముక్కల్ని మిక్సీ పట్టాలి. అందులో ఉల్లిగడ్డ తరుగు, పచ్చిమిర్చి, అల్లం పేస్ట్, బియ్యప్పిండి, ఉప్పు, జీలకర్ర, నీళ్లు వేసి ముద్దలు కలిపి పక్కన పెట్టాలి.

 ఒక మందపాటి పాన్ మీద కలిపిన ముద్దనుపెట్టి చూట్టూ వత్తాలి. ఆ తరువాత నూనెను పైన చల్లుతూ పాన్ కేక్​ను  రెండువైపులా కాల్చాలి. పిల్లలు చాలా ఇష్టంగా తింటారు.