మహారాష్ట్రలోని పూణేలో సెప్టిక్ ట్యాంక్ క్లీన్ చేస్తూ ఇద్దరు పారిశుధ్య కార్మికులు ప్రాణాలు కోల్పోయారు. మరొకరు గల్లంతయ్యారు. హౌసింగ్ సొసైటీలోని సెప్టిక్ ఛాంబర్‌ను కార్మికులు శుభ్రం చేస్తుండగా ఈ విషాద ఘటన చోటుచేసుకుంది. పూణే మెట్రోపాలిటన్ రీజియన్ డెవలప్‌మెంట్ అథారిటీ అధికారులు తెలిపిన వివరాల ప్రకారం, పూణేలోని వాఘోలి ప్రాంతంలో ఒక ప్రైవేట్ సొసైటీకి చెందిన సెప్టిక్ ఛాంబర్‌ను ఎప్పటిలాగే శుభ్రం చేయడానికి వెళ్లారు. ఈ క్రమంలోనే ఇద్దరు మృతి చెందగా, మరొకరు మిస్సయ్యారు. అయితే ఈ గల్లంతైన వ్యక్తి కోసం అధికారులు సెర్చింగ్ ప్రారంభించారు. కాగా దీనికి సంబంధించిన మరిన్ని వివరాలు తెలియాల్సి ఉంది.
సెప్టిక్ ట్యాంక్ ను శుభ్రం చేస్తూ చనిపోవడం ఇదేం మొదటి సారి కాదు. ఈ తరహా ఘటనలు దేశంలోని పలు రాష్ట్రాల్లో ఇంతకు మునుపు చూసినవే. సెప్టిక్ ట్యాంకును క్లీన్ చేసే సమయంలో వెలువడే వాయువులతో ఊపిరాడక ఈ విధమైన ఘటనలు చోటుచేసుకుంటున్నాయి. వారికి ఆ సమయంలో ప్రత్యేకమైన ఎక్విప్ మెంట్ ను సమకూర్చాలని గతంలో పలువురు కోరినా.. ఇప్పటికీ ఆ విషయంలో ఎలాంటి మార్పూ రాలేదు.
