చండీగఢ్: పంజాబ్లో హృదయవిదారక ఘటన జరిగింది. కెనడాలో చదువుకుంటున్న కొడుకు హత్యకు గురికాగా, అతడి మరణాన్ని తట్టుకోలేక తల్లి ఆత్మహత్య చేసుకుంది. తల్లీకొడుకు మరణంతో ఆ కుటుంబం శోకసంద్రంలో మునిగిపోయింది. శనివారం ఒకేసారి ఇద్దరి అంత్యక్రియలు నిర్వహించింది. భగత్ సింగ్ నగర్ జిల్లాలోని కరీంపూర్ చాహ్వాలా గ్రామానికి చెందిన గుర్విందర్ నాథ్(24) చదువుకునేందుకు కెనడాకు వెళ్లాడు. అక్కడ పిజ్జా డెలివరీ బాయ్గా పార్ట్ టైమ్ జాబ్ చేసుకుంటూ చదువుకుంటున్నాడు. ఈ నెల 9న రాత్రి పిజ్జా డెలివరీ చేసేందుకు వెళ్తుండగా, కొంతమంది దుండగులు అతనిపై దాడి చేశారు. తీవ్రంగా గాయపడిన గుర్విందర్ను ఆస్పత్రిలో చేర్పించగా, ఐదు రోజుల పాటు మృత్యువుతో పోరాడి చనిపోయాడు.
గుర్విందర్ చనిపోయిన విషయాన్ని అతని స్నేహితులు.. పంజాబ్ లోని కుటుంబసభ్యులకు ఫోన్ చేసి చెప్పారు. అయితే ఈ విషయాన్ని గుర్విందర్ తల్లి నరీందర్ కౌర్ కు కుటుంబసభ్యులు చెప్పలేదు. గుర్విందర్ డెడ్ బాడీని ఇండియాకు తీసుకొచ్చేందుకు ప్రయత్నాలు చేశారు. శుక్రవారం ఢిల్లీ ఎయిర్ పోర్టుకు డెడ్ బాడీ వస్తుందని తెలిసి, అప్పుడు కొడుకు చనిపోయిన విషయాన్ని తల్లికి చెప్పారు. ఆ వార్త విని నరీందర్ కౌర్ తట్టుకోలేకపోయింది. తీవ్ర మనస్తాపానికి గురై, విషం తాగి ఆత్మహత్య చేసుకుంది. అటు కొడుకు డెడ్ బాడీ ఇంటికి చేరకముందే, ఇటు తల్లి చనిపోవడంతో ఆ కుటుంబం విషాదంలో మునిగిపోయింది. శుక్రవారం రాత్రి గుర్విందర్ డెడ్ బాడీ ఇంటికి చేరుకోగా.. శనివారం ఉదయం తల్లి, కొడుకు ఇద్దరి అంత్యక్రియలు ఒకేసారి నిర్వహించారు.
