ఫిట్గా, హెల్దీగా ఉండాలనుకుంటారు అందరూ. కానీ, డెడికేషన్ లేక... డైట్ప్లాన్, ఫిట్నెస్ జర్నీని మధ్యలోనే ఆపేస్తారు చాలామంది. అలాంటివాళ్లకు మోటివేషన్ ఇచ్చి ఫిట్నెస్ రొటీన్, ఫుడ్ ప్లాన్ పాటించేలా చేస్తోంది సొమ్యా లుహాదియా. తను ఒక యంగ్ ఎంట్రప్రెనూర్. మహిళలు, అమ్మాయిలు హెల్దీఫుడ్ తింటూ, ఆరోగ్యంగా ఉండాలనే లక్ష్యంతో ‘హెల్త్ అకాడమీ’ పెట్టింది. ప్రపంచంలోని టాప్ ఫిట్నెస్ ఇన్ఫ్లుయెన్సర్లు, మోటివేటర్లలో ఒకరిగా పేరు తెచ్చుకుంది. ఆమె ఇన్స్పైరింగ్ జర్నీ ఇది...
సొమ్యాది రాజస్తాన్లోని జైపూర్. జార్ఖండ్లోని రాంచీలో ఉన్న బిర్లా ఇనిస్టిట్యూట్ ఆఫ్ టెక్నాలజీ యూనివర్సిటీలో బీటెక్ చదివింది. అందరిలా జాబ్ కోసం ట్రై చేయలేదు. తనకెంతో ఇష్టమైన హెల్త్, ఫిట్నెస్ రంగంలో ఎంట్రప్రెనూర్గా సక్సెస్ అవ్వాలని కలలు కన్నది. ప్రతి ఒక్కరికీ హెల్దీ లైఫ్స్టయిల్ అలవాటు చేయాలనుకుంది. అనుకున్నట్టుగానే ఇప్పుడు రోజూ10 లక్షల మంది మహిళలకి ఫిట్నెస్ పాఠాలు చెప్పే స్థాయికి ఎదిగింది. ఇంటర్నేషనల్ స్పోర్ట్స్ సైన్స్ అసోసియేషన్ (ఐఎస్ఎస్ఎ) సర్టిఫికెట్ సాధించింది. ఆ తర్వాత 2017లో సొంత ఊళ్లోనే ‘హెల్త్ అకాడమీ’ మొదలుపెట్టింది. హెల్త్, ఫిట్నెస్ ట్రైనింగ్ సెషన్స్, కోర్సులు స్టార్ట్ చేసింది. ఇప్పుడు ఆ అకాడమీ కోటిన్నర రూపాయల టర్నోవర్ తెచ్చి పెడుతోంది.
వారం వారం వీడియోలు
సొమ్యా ఫిట్నెస్ ట్రైనర్ మాత్రమే కాదు న్యూట్రిషనిస్ట్, వెయిట్ లాస్ మేనేజ్మెంట్ స్పెషలిస్ట్ కూడా. ఆన్లైన్ ద్వారా ఎక్కువ మందికి ఫిట్నెస్ పాఠాలు చెప్పాలని 2018లో ‘ది గ్లో గర్ల్స్ టేల్స్’అనే యూట్యూబ్ ఛానెల్ పెట్టింది. ఆ ఛానెల్లో ప్రతి వారం హెల్త్, ఫిట్నెస్, లైఫ్స్టయిల్కి సంబంధించిన వీడియోలు పెడుతుంది. సొమ్యా యూట్యూబ్ ఛానెల్కి 10 లక్షల మందికి పైగా సబ్స్క్రయిబర్స్ ఉన్నారు. అంతేకాదు ప్రపంచవ్యాప్తంగా దాదాపు వంద కోట్ల మంది ఆమె ఫిట్నెస్ వీడియోల్ని చూశారు. సొమ్యాకి ఇన్స్టాగ్రామ్లో రెండు లక్షల మంది ఫాలోవర్లు ఉన్నారంటే ఆమె చెప్పే ఫిట్నెస్ పాఠాలకున్న క్రేజ్ అర్థం చేసుకోవచ్చు.
ఫిట్నెస్ యాప్
కిందటి ఏడాది ‘జిజిటి ఫిట్’ అనే ఫిట్నెస్ యాప్ తీసుకొచ్చింది సొమ్య. ఈ యాప్ని ఇప్పటివరకూ 10వేల మంది మహిళలు ఇన్స్టాల్ చేసుకున్నారు. ఇందులో బరువు తగ్గడానికి, బాడీ ట్రాన్స్ఫర్మేషన్, పొట్ట చుట్టూ కొవ్వు కరగడానికి కోర్సులు చెబుతోంది సొమ్య. కస్టమర్ల ఫిజిక్కి సరిపోయే వర్కవుట్ ప్లాన్స్, ఫుడ్ ప్లాన్స్ డిజైన్ చేస్తుంది. అంతేకాదు ఎప్పటికప్పుడు వాళ్ల ప్రోగ్రెస్ని అంచనా వేసి, వాళ్లు అనుకున్న రిజల్ట్ వచ్చేందుకు సాయం చేస్తుంది.
ఇవి చాలా ముఖ్యం
‘‘మన శరీరంతో మనం అనుబంధం పెంచుకోవాలి. సరైన ఫుడ్ తినాలి. అప్పుడే ఫిట్నెస్, హెల్త్ బాగుంటుంది. సంతోషంగా ఉంటాం కూడా. ఎంత సంపాదిస్తున్నారు? అనే దానికంటే ఎలాంటి ఫుడ్ తింటున్నారు? అనేది చాలా ముఖ్యం. ఏ డ్రెస్ వేసుకున్నారన్నది కాదు, ఏ ఎక్సర్సైజులు చేస్తున్నారన్నది పాయింట్. తిండి, వ్యాయామం...ఈ రెండూ మనల్ని హెల్దీగా, ఫిట్గా ఉంచుతాయి. నా దగ్గరికి ఫిట్నెస్ ట్రైనింగ్కి వచ్చేవాళ్లకి నేను చెప్పే మొదటి మాట ఇదే” అని చెబుతోంది ఈ యంగ్ ఎంట్రప్రెనూర్.
