ఈ సృష్టిలో తల్లి ప్రేమ అనేది చాలా నిజమైనది. ఆ ప్రేమలో కల్మషం అంటూ ఏమి ఉండదు. ఏ తల్లయినా తన బిడ్డలు పెరిగి పెద్దయి ప్రయోజకులవ్వాలనే కోరుకుంటుంది. చిన్నతనంలో గోరుముద్దలు తినిపించి లాలించే అమ్మే.. ఎదిగి ప్రయోజకులుగా మారేందుకు కాస్త కఠినత్వం ప్రదర్శిస్తోంది. ఆ కాఠిన్యం కూడా తన పిల్లల బాగుపడాలనే ఉద్దేశ్యంతో చూపిస్తుంది. మానవుల నుండి అడవి జంతువుల వరకు.. ఈ తల్లి ప్రేమ బిడ్డల విషయంలో ఒకే రకంగా ఉంటుంది. వ్యక్తపరచే భావాలు వేరుగానీ చూపించే ప్రేమ మాత్రం ఒక్కటే.
ఇండియన్ ఫారెస్ట్ ఆఫీసర్ సుశాంత నందా తన ట్విటర్ లో పోస్ట్ చేసిన ఓ వీడియో ఇందుకు సాక్ష్యంగా నిలుస్తోంది. ఓ తల్లి పులి తన రెండు మగ పిల్లలను స్వంతంగా వేటాడమని తిడుతున్నట్టు ఉన్న వీడియో వైరల్ అవుతుంది. ఆ పులి పిల్లలు రెండున్నర ఏండ్లు వచ్చినా ఇంకా తల్లి వద్దే ఉండడంతో ఆ తల్లి పులి కోపంతో గాండ్రిస్తుంది. సాధారణంగా పులి పిల్లలు పుట్టిన నాటి నుంచి 18 నెలల వయసు తర్వాత తమంతట తాము వేటాడటం తెలుసుకుంటాయి. ఎవ్వరిపై ఆధారపడకుండా తమకు తాము ఆహారాన్ని సమకూర్చుకోగల సామర్ధ్యం కలిగి ఉంటాయి. కానీ రెండున్నరేళ్లు వచ్చినా ఆ పులి పిల్లలు ఇంకా తల్లి దగ్గరకే వస్తుండడంతో ఆ మాతృమూర్తికి కోపం వచ్చింది. ఆ ఆన్నదమ్ముల్ని స్వంతంగా వేటాడమని గాండ్రించింది. ఆ అరుపులకు భయపడ్డ ఆ పిల్లలు ఇక తమంతట తామే ఆహారాన్ని వేటాడాలని నెమ్మదిగా అక్కడి నుంచి కదిలాయి. ఇందుకు సంబంధించిన 30 సెకన్ల వీడియో ప్రస్తుతం ట్విటర్ లో వైరల్ అవుతోంది.
Final good bye. It’s time for the two male cubs to leave their mother & establish own territory. By 18 months the cubs know how to hunt on their own but may stay still 2.5 yrs with mother. Here the mother pushes the unwilling brothers to leave. From one South India TR( WA by FD) pic.twitter.com/wFhPQd0in1
— Susanta Nanda IFS (@susantananda3) February 11, 2020
