హైదరాబాద్, వెలుగు: రాష్ట్ర ప్రభుత్వానికి మరో రూ. 3 వేల కోట్ల అప్పు ఇచ్చేందుకు ఆర్బీఐ అంగీకరించింది. ఈ నెల 28వ తేదీ మంగళవారం ఆర్బీఐ నిర్వహించే సెక్యూరిటీ వేలంలో పాల్గొని ఈ మొత్తాన్ని రాష్ట్ర ఆర్థిక శాఖ తెచ్చుకోనుంది. వరుసగా 12, 13, 14 సంవత్సరాల టెన్యుర్తో ఈ అప్పును తెలంగాణ తీసుకోనున్నదని శుక్రవారం ఆర్బీఐ ప్రకటించింది. అయితే.. ఈ నెల 7న రూ.4 వేల కోట్ల అప్పును ఆర్బీఐ నుంచి రాష్ట్ర సర్కార్ తీసుకున్నది. మరోసారి తీసుకోనున్న రూ. 3 వేల కోట్ల అప్పుతో ఒక్క నెలలో రూ.7 వేల కోట్లు అవుతుంది. ఏప్రిల్ నుంచి జూన్ వరకు ఈ మూడు నెలల కాలంలో రూ.15 వేల కోట్లు అప్పు తీసుకోవాలని రాష్ట్ర ప్రభుత్వం భావించగా, ఇష్టారీతి అప్పులపై అన్ని రాష్ట్రాలపై సీరియస్ అయిన కేంద్రం.. గ్యారంటీ అప్పులపై పూర్తి వివరాలు ఇవ్వాలని స్పష్టం చేసింది. దీంతో రాష్ట్రం నివేదిక పంపగా.. అది తప్పులతడకగా ఉందంటూ కేంద్రం వెనక్కి పంపింది. ఈ నెల 7న ఇచ్చిన నాలుగు వేల కోట్ల అప్పు తాత్కాలికంగా మంజూరు చేసినవేనని ఆర్బీఐ అప్పట్లోనే పేర్కొంది. అయితే 28వ తేదీన తీసుకునే అప్పు వన్టైం కోసమా.. లేదా రెగ్యులర్ బేసిస్లో ఇచ్చారా.. అనేది తమకు కూడా స్పష్టత లేదని రాష్ట్ర ఆర్థిక శాఖ వర్గాలు తెలిపాయి.
రైతుబంధుకు ఊరట
ఈ నెల 28 నుంచి రైతుబంధు ఇవ్వనున్నట్లు రాష్ట్ర ప్రభుత్వం ప్రకటించింది. వాస్తవానికి 15వ తేదీ నుంచే రైతుబంధు పంపిణీ చేయాల్సి ఉంది. అయితే నిధుల కొరతతో ఆలస్యమైంది. ఆర్బీఐ నుంచి అప్పు పుడుతుండటంతో ఇప్పుడు కాస్త ఊపిరి పీల్చుకుంది. రూ. 3 వేల కోట్లను పూర్తిగా రైతుబంధుకే మళ్లించనున్నట్లు ఫైనాన్స్ వర్గాలు పేర్కొంటున్నాయి. ఈ స్కీంకు ఎకరాకు రూ. 5 వేల చొప్పున మొత్తం రైతులకు రూ.7,400 కోట్లు చెల్లించాల్సి ఉన్నది.
