న్యూఢిల్లీ: కేంద్ర మంత్రి స్మృతి ఇరానీ దాఖలు చేసిన పరువు నష్టం దావాపై కాంగ్రెస్ నేతలు జైరాం రమేశ్, పవన్ ఖేరా, నెట్టా డిసౌజాలకు ఢిల్లీ హైకోర్టు సమన్లు జారీ చేసింది. మంత్రి, ఆమె కూతురుపై సోషల్ మీడియాలో చేసిన ట్వీట్లను తొలగించాలని కాంగ్రెస్ నేతలను హైకోర్టు ఆదేశించింది. కాంగ్రెస్ నేతలు 24 గంటల్లోపు తొలగించకపోతే, ట్విటర్, ఫేస్బుక్, యూట్యూబ్ చొరవ తీసుకుని వాటిని తొలగించాలని హైకోర్టు పేర్కొంది. స్మృతి కూతురు జోయిష్ఇరానీ(18) గోవాలో ఇల్లీగల్గా బార్ నడుపుతున్నారని కాంగ్రెస్ నేతలు ఆరోపించారు. ఈ నేపథ్యంలో స్మృతిని మంత్రి పదవి నుంచి తొలగించాలని ప్రధానిని వారు డిమాండ్ చేశారు. దీంతో కాంగ్రెస్ నేతలపై మంత్రి తీవ్రంగా మండిపడ్డారు.
తనపై, తన కూతురుపై నిరాధార ఆరోపణలు చేశారంటూ వారిపై స్మృతి రూ.2 కోట్లకుపైగా పరువునష్టం దావా వేశారు. వాస్తవాలను ధ్రువీకరించుకోకుండా మంత్రిపైనా, ఆమె కూతురుపైనా కాంగ్రెస్ నేతలు నిరాధార ఆరోపణలు చేశారని హైకోర్టు కూడా పేర్కొంది. ఆ నేతల ఆరోపణలతో మంత్రి పేరు ప్రతిష్టలకు డ్యామేజీ కలిగిందని వ్యాఖ్యానించింది. ఈ నేపథ్యంలో తల్లీకూతురుపై చేసిన ఆరోపణలను, మార్ఫింగ్చేసిన ఫొటోలను అన్ని సోషల్ మీడియా ప్లాట్ఫాంల నుంచి తొలగించాలని కాంగ్రెస్ నేతలకు హైకోర్టు సూచించింది. కేసు విచారణను వచ్చే నెల 18కు వాయిదా వేసింది.