ముంబై: మార్కెట్లోని మిగులు లిక్విడిటీని తగ్గించేందుకు ప్రవేశపెట్టిన ఇంక్రిమెంటల్ క్యాష్ రిజర్వ్ రేషియో (ఐ-సీఆర్‌‌ఆర్)ను శనివారం నుంచి దశలవారీగా నిలిపివేయాలని రిజర్వ్ బ్యాంక్ శుక్రవారం నిర్ణయించింది. ఈ ఏడాది మే 19 నుంచి జులై 28 మధ్య ‘నెట్ డిమాండ్, టైమ్ లయబిలిటీ (ఎన్డీటీఎల్) పెరుగుదలపై 10 శాతం ఐసీఆర్ఆర్ను నిర్వహించాలని ఆగస్టులో బ్యాంకులను ఆర్బీఐ ఆదేశించింది.
రూ. 2,000 నోట్లను బ్యాంకింగ్ వ్యవస్థకు తిరిగి ఇవ్వడంతో సహా వివిధ మార్గాల ద్వారా వచ్చిన మిగులు లిక్విడిటీని తీసుకోనుంది. ఐసీఆర్ఆర్ కింద సీజ్ చేసిన మొత్తాలను దశలవారీగా విడుదల చేస్తారు. తద్వారా సిస్టమ్ లిక్విడిటీ ఆకస్మిక షాక్‌‌లకు గురికాకుండా మనీ మార్కెట్లు సక్రమంగా పనిచేస్తాయి. బ్యాంకులు నిర్వహిస్తున్న ఐసీఆర్ఆర్ మొత్తంలో 25 శాతంను శనివారం, మరో 25 శాతంను సెప్టెంబరు 23న విడుదల చేస్తామని.. మిగిలిన మొత్తాన్ని అక్టోబర్ 7న విడుదల చేస్తామని ఆర్బీఐ తెలిపింది.
