విశాలమైన పచ్చిక మైదానాలు.. చుట్టూ ద్రాక్ష తోటలు.. మధ్యలో ఓ చిన్న ఊరు. కాదు.. కాదు.. రిచెస్ట్ రిసార్ట్. దాని పేరు బోర్గో శాన్ ఫెలిస్. ఇటలీలలో ఉన్న ఈ రిసార్ట్ ఎకో ఫ్రెండ్లీ ఫర్నిచర్, హిస్టారికల్ లుక్స్తో చాలా బాగుంటుంది. ఫుడ్, వైన్ ఇక్కడి ప్రత్యేకతలైతే.. వాటికి మించిన ప్రశాంతత ఇక్కడ బోనస్. ఈ ప్రదేశం గురించి తెలిసినవాళ్లు అన్నీకలిసి వస్తే ఒక్కసారైనా వెళ్తారు. అంతేకాదు.. ఈ ఊరు పెండ్లిళ్లకు చాలా స్పెషల్. అందుకే సినీ సెలబ్రిటీలు చాలామంది పెండ్లి చేసుకునేందుకు బోర్గోను వేదికగా చేసుకుంటున్నారు. అంతెందుకు లేటెస్ట్గా మెగా హీరో వరుణ్ తేజ్, హీరోయిన్ లావణ్య త్రిపాఠిలు మ్యారేజ్ జరిగింది కూడా ఇక్కడే.
బోర్గో శాన్ ఫెలిస్.. ఇది మధ్యయుగం కాలం నాటి ఊరు. మరీ ముఖ్యంగా ఎనిమిదో శతాబ్దానికి చెందిన ఆనవాళ్లు ఎక్కువగా కనిపిస్తాయి. ఇరుకైన వీధులు, రోమన్ స్టయిల్లో కట్టిన చర్చ్, వందకు పైగా హెక్టార్ల విస్తీర్ణంలో పెంచిన ద్రాక్ష తోటలతో అందంగా కనిపిస్తుంది ఈ ఊరు. ఇక్కడ తయారుచేసే వైన్ని ‘చియాంటి క్లాసికో’ అంటారు. ఈ ఊరి స్పెషల్ ఇది. బోర్గో టౌన్ మధ్యలో పెద్ద ఓపెన్ ఏరియా ఉంటుంది. చిన్న చర్చి, కొంత ప్లేస్లో గోడౌన్లాంటి పెద్ద బిల్డింగ్లు, వైన్ యార్డ్లు, ఆలివ్ చెట్లతో అందంగా కనిపిస్తుంది.
ఎటు చూసినా పచ్చిక బయళ్లు, పచ్చని చెట్లు కనిపించే ఈ ప్రదేశంలో ఉండేందుకు కొన్ని గదులు ఉంటాయి. అక్కడి నుంచి చూస్తే ప్రకృతి ఒడిలో ఒదిగిన పల్లెటూళ్లో ఉన్నామా? అనిపించడం ఖాయం. నిజానికి ఇప్పుడు దీన్ని ‘ఊరు’ అనకూడదు. ఎందుకంటే ఇప్పుటు ఇదొక పెద్ద ఫైవ్ స్టార్ హోటల్. ఇటలీలోని క్యాజెల్నొవొ బెరర్డెంగలో ఉంది. సియెన నుంచి ఇరవై నిమిషాల జర్నీ.
ఖరీదుకు తగ్గ ప్రశాంతత
చెక్కతో ఏర్పాటు చేసిన బీమ్స్, తెల్లరాతి లేదా లైట్ కలర్ రాళ్లతో కట్టిన బిల్డింగ్స్. ఓక్ కలపతో వేసిన ఫ్లోరింగ్, స్థానిక కళాకారులు వేసిన సెరామిక్ ఆర్ట్ ప్రత్యేక ఆకర్షణలు. టుస్కన్ స్టయిల్లో కట్టిన ఈ రూమ్స్ లగ్జరీగా ఉంటాయి. ఈ గదుల్లో చరిత్రను గుర్తు చేసేలాంటి డెకొరేషన్ ఉంటుంది. బాగా ప్రైవసీ కావాలనుకునేవాళ్లకు, ఫ్యామిలీతో వచ్చేవాళ్లకు... విడిగా రెండు విల్లాలు ఉన్నాయి. వాటి పేర్లు ‘కస్సనొవ, కొలొనొవ’. ఊరు దాటగానే ఆ రెండు విల్లాలే కనిపిస్తాయి. రెండిటికీ ప్రైవేట్ గార్డెన్స్ ఉంటాయి. కిచెన్తో పాటు పూల్ వంటి లగ్జరీ సౌకర్యాలన్నీ ఉంటాయి. ఇక్కడ ఖరీదైన స్పా కూడా ఉంది. ఇక్కడ ప్రత్యేకంగా యాంటీ ఏజింగ్ కోసం అని ఇటలీ ప్రొడక్ట్లు వాడతారు. అలాగే టెక్నోజిమ్ ఎక్విప్మెంట్తో పెద్ద ఫిట్నెస్ ఏరియా కూడా ఉంది.
వైల్డ్ ఫుడ్
ప్రకృతి, అందాలు, ప్రశాంతతే కాదు ఇక్కడి ఫుడ్ కూడా సూపర్గా ఉంటుంది. పాస్తా, ట్రెడిషనల్ ఫ్లోరెంటైన్ స్టయిల్లో చేసిన బ్రెడ్తోపాటు నాన్ వెజ్ వంటకాలు ఉంటాయి. వాటిని ‘వైల్డ్ గేమ్’ అని పిలుస్తారు. అడవిలో అడవి జింక, దుప్పి, కుందేలు, ఉడుత, రాకూన్స్ వంటి జంతువులతో పాటు అడవి పక్షులైన డక్, టర్కీ, కౌజు వంటివి రుచికరంగా వండి పెడతారు. ఫుడ్తోపాటు ఇక్కడున్న వైన్యార్డ్లు గెస్ట్లను అట్రాక్ట్ చేస్తాయి. ఇక్కడ తయారయ్యే వైన్ ఇతర ప్రాంతాలకు ఎక్స్పోర్ట్ అవుతుంది.
హ్యాపీ గార్డెన్
ఇక్కడి ఎల్ ఓర్టో ఫెలిస్ లేదా ది హ్యాపీ వెజిటబుల్ గార్డెన్ కచ్చితంగా చూడాలి. అక్కడ చాలా పండ్లు, మొక్కలు, కూరగాయలు పండిస్తారు. ఈ గార్డెన్లో వృద్ధులు, దివ్యాంగులైన పిల్లల కోసం కమ్యూనిటీ ప్రోగ్రామ్ చేస్తారు.
సీజన్లో మాత్రమే ఓపెన్
ఇక్కడికి వెళ్లాక చుట్టుపక్కల తిరిగేందుకు కారు అద్దెకి తీసుకోవచ్చు. బోర్గోలో కారు తీసుకుని దగ్గర్లోని సియెనా టౌన్కి వెళ్లొచ్చు. ఈ జర్నీ పావుగంట ఉంటుంది. బోర్గో వెళ్లడానికి బెస్ట్ టైం జులై, ఆగస్ట్ నెలలు. ఆ సీజన్లో పాలియో డి సియెనా హార్స్ రేస్ జరుగుతుంది. అందులో పది గుర్రాలు, రైడర్స్ ఉంటారు. ఈ ట్రెడిషన్14వ శతాబ్దం నుంచి కొనసాగుతోంది. అప్పుడు ఇక్కడి స్థానికులు, విజిటర్స్తో కళకళలాడుతుంది. దీనికి ఇక్కడ చాలా క్రేజ్ ఉంటుంది. బోర్గో శాన్ ఫెలిస్ సీజనల్ హోటల్. అందుకని డిసెంబర్ నుంచి మార్చి వరకు క్లోజ్ చేసి ఉంచుతారు.
