- రూ.21 లక్షలు పెట్టి కొన్నానన్న బాధితుడు
- ఇల్లు కడుతుంటే ఎక్కడికి పోయారని ప్రశ్న
- లంచం ఇవ్వలేదనే పడగొట్టారని ఆవేదన
- జగద్గిరిగుట్ట భూదేవి హిల్స్లో ఘటన
జీడిమెట్ల, వెలుగు: కుత్బుల్లాపూర్నియోజకవర్గంలో రూ. కోట్ల విలువైన ప్రభుత్వ భూములను కొందరు కబ్జా చేసి అమ్మి రూ. కొట్లు గడిస్తున్నారు. వాటిని కాపాడాల్సిన అధికారులు ముడుపులు తీసుకుని పట్టించుకోవడంలేదు. దీంతో అమాయక ప్రజలు మోసపోతున్నారు. జగద్గిరిగుట్ట డివిజన్పరిధి భూదేవి హిల్స్లో వందల ఎకరాల ప్రభుత్వ భూమి ఉంది. ఇందులో చాలామంది ప్లాట్లు చేసి అమాయక జనాలకు లక్షలకు అంటగడుతున్నారు.
2018లో ఒకచోట బాలకృష్ణ అనే వ్యక్తి ఓదెలుకు రూ.21 లక్షలకు ప్లాట్ అమ్మాడు. దాన్ని నోటరీ చేసి ఇచ్చాడు. దీంతో ఓదెలు ఈ మధ్యే రేకుల షెడ్డు కట్టుకున్నాడు. ఈ విషయం తెలుసుకున్న కుత్బుల్లాపూర్రెవెన్యూ సిబ్బంది గురువారం కూల్చివేశారు. దీంతో బాధితుడు ఓదెలు మాట్లాడుతూ.. తాను బాలకృష్ణ అనే వ్యక్తి దగ్గర డబ్బులు పెట్టి కొన్నానని, అతడిని అడిగితే ప్రైవేట్స్థలమని చెప్తున్నాడన్నారు. ఇల్లు కట్టుకున్నాక వచ్చి ప్రభుత్వ స్థలం అని కూల్చివేశారని, కడుతుంటే అధికారులంతా ఎక్కడికి వెళ్లారని ప్రశ్నించారు. తనను లంచం అడిగారని ఇవ్వకపోవడంతోనే కూల్చివేశారని ఆరోపించాడు.
ఆ ఆరోపణల్లో నిజం లేదు
ఈ విషయమై కుత్బుల్లాపూర్ ఆర్ఐ ఖలీమ్ను వివరణ కోరగా ప్రభుత్వ స్థలంలో నిర్మాణం చేయడంతోనే కూల్చేశామని, లంచం అడిగామన్న ఆరోపణల్లో నిజం లేదన్నారు. ప్రభుత్వ భూమిలో కొంత మంది తప్పుడు సర్వేనంబర్లు వేసి అమాయక ప్రజలను మోసం చేస్తున్నారని చెప్పారు. ఇప్పటికే అలాంటి వారిపై పోలీసులకు ఫిర్యాదు చేశామని చెప్పారు. ప్రజలు రిజిస్ట్రేషన్ఉంటేనే స్థలాలు కొనాలని, నోటరీ చేస్తే కొనవద్దని సూచించారు.
